ပုတီးစိပ်ရာတွင် အချို့က စကားပြောရင်း လမ်းလျှောက်ရင်း အိပ်ရင်း စိပ်ကြ၍
အချို့က ဘုရားရှေ့တွင် စနစ်တကျထိုင်၍ စိပ်ကြပါသည်၊ ဘယ်အရာက မှန်ပါသလဲဘုရား။
ဘယ်လိုနှလုံးသွင်းပြီး စိပ်သင့်ပါသလဲဘုရား၊
ဥပုသ်နေ့တွေမှာ ၀င်လေ ထွက်လေမှတ်ပြီး တရားထိုင်ခြင်းနှင့် ပုတီးစိပ်ခြင်းမှာ ဘယ်အရာကို ပြုလုပ်သင့်ပါသလဲဘုရား။
( မစန်းစန်းနွယ်-ရေနံချောင်းကျေးရွာ၊ မအူပင်မြို့နယ် )

( ဖြေ )
ပုတီးစိပ်ခြင်းမှာ စိတ်ကို ထိန်းချုပ်၍ သမာဓိရအောင် လုပ်သောအလုပ်ဖြစ်ရာ စိတ်တည်ငြိမ်ပြီး သမာဓိရနိုင်သော ဣရိယာပုထ်ဖြင့်သာ ပြုလုပ်သင့်ပါသည်။
ထိုင်၍စိပ်ခြင်း၊ လျောင်း၍စိပ်ခြင်းတို့က ပို၍ သမာဓိရစရာရှိပြီး ဘုရားရှေ့တွင် ထိုင်ကာ ဘုရားအာရုံဖြင့် စိပ်ခြင်းက ပို၍ ကောင်းမွန်ဖွယ် ရှိပါသည်။
ပုတီးစိပ်သည် ဆိုရာ၌ အများအားဖြင့် မြတ်စွာဘုရား၏ ဂုဏ်တော်ကို အာရုံပြု၍ စိပ်ရသဖြင့် မိမိနှုတ်တက်ရ၍
ကျေပွန် ပွန်းတီးလျက်ရှိသော ဂုဏ်တော်ကိုးပါးကို အာရုံယူ နှလုံးသွင်း၍ စိပ်ခြင်းသာ အကောင်းဆုံးဖြစ်ပါသည်။

တရားမှတ်ခြင်းနှင့် ပုတီးစိပ်ခြင်းတွင် ပုတီးစိပ်ခြင်းမှာ သမထဘာဝနာ၌ အကျုံးဝင်၍ တရားမှတ်ခြင်းမှာ ၀ိပဿနာ ဘာဝနာ၌ အကျုံးဝင်ပါသည်၊ ထို့ကြောင့် ထိုနှစ်မျိုးတွင် တရားမှတ်ခြင်းက ပို၍ အဆင့်မြင့်သဖြင့် ပြုလုပ်သင့်ပါသည်။