••••••••••••••••••••••••••••••••••••••••••••••••
ရိုသေစွာ မေးလျှောက်အပ်ပါသည် အရှင်ဘုရား၊
အရှင်ရာဟုလာသည် ဗုဒ္ဓဘုရားရှင်ရဲ့
သားတော်ဖြစ်ရန် မည်သို့ ဆုတောင်းခဲ့သည်ကို
သိလိုပါသည်။ အရှင်မြတ်သည် ကိုရင်ဝတ်နဲ့
ရဟန္တာ ဖြစ်တာလား ရဟန်း အဖြစ်သို့ ရောက်ပြီးမှ
ရဟန္တာဖြစ်တာလား။ အရှင်ရာဟုလာသည် မည်သည့်
အချိန်တွင် ပရိနိဗ္ဗာန်စံပါသနည်း။
ဘုရားရှင် ပရိနိဗ္ဗာန်စံပြီးမှလား ၊မစံခင်လားဆိုတာကို
ဖြေကြားပေးစေလိုပါသည်။
(စုသက်မွန်)
မေးခွန်းကို ဖြေဖို့ ဗုဒ္ဓရဲ့ သားတော် အရှင်ရာဟုလာ
အကြောင်းကို လေ့လာရင်း စိတ်ဝင်စားဖွယ်
အချက်အလက်တွေကို တွေ့ရှိရပြီး အဲဒါတွေကို
ချန်မထားခဲ့ချင်တာနဲ့ အားလုံးကို စုပေါင်း ဖော်ပြလိုက်ပါတယ်။
သဒ္ဓါတရား ရှေ့သွားပြုပြီး ဖတ်ရှုလေ့လာပြီး
အတုယူ ကျင့်သုံးနိုင်ပါစေ။
“နဂါမင်း”
••••••••••••••••
ပဒုမုတ္တရ ဘုရားလက်ထက်က ဟံသာဝတီပြည်မှာ
အင်မတန် ချစ်ခင်ကြတဲ့ သူဌေးသား နှစ်ယောက် ရှိတယ်။
အမျိုးအမည်ကို မဖော်ပြဘူး။
အတွေးအမြင်တူညီကြတဲ့ သူငယ်ချင်း နှစ်ယောက်ဟာ
ပစ္စည်းဥစ္စာရဲ့ အနှစ်သာရကိုပဲ ရယူတော့မယ်ဆိုပြီး
အလှူဒါန များစွာ ပြုလုပ်ကြရင်း ကွယ်လွန်တဲ့အခါ
မိမိတို့ ကိုးကွယ်တဲ့ ဆရာရသေ့ သင်ကြားတာကို လိုက်နာ
ဆုတောင်းခဲ့တဲ့အတိုင်း တစ်ယောက်က ပထဝိန္ဓရ အမည်ရှိတဲ့
နဂါးမင်း (မ-ဋ္ဌ ၃၊ ၂၀ဝ။ ရဋ္ဌပါလသုတ် အဖွင့်မှာတော့
ဘူမန္ဓိရ နဂါးပြည်မှာ “ပါလိတ”အမည်ရှိတဲ့ နဂါမင်းလို့
ဆိုတယ်)။ကျန်တစ်ယောက်က သိကြားမင်း ဖြစ်တယ်။
နဂါးမင်းဟာ သိကြားမင်းကို ခစားရတယ်။
နဂါးမင်း အခစားလာတဲ့အခါ သိကြားမင်းက မှတ်မိပြီး၊
နဂါးအဖြစ်ကို မနှစ်သက်တဲ့ သူငယ်ချင်းကို ပဒုမုတ္တရ
မြတ်စွာဘုရားနဲ့ ရဟန္တာတွေကို ပင့်ဖိတ်အလှူဒါနပြုပြီး
သိကြားမင်းအဖြစ်ကို ပြန်ဆုတောင်းဖို့ အကြံပေးတယ်။
ဒါနဲ့ နဂါးမင်းဟာ ဗုဒ္ဓအမှူးပြုတဲ့ ရဟန္တာတစ်ထောင်ကို
ဆွမ်းကပ်လှူတယ်။ ရဟန်းတွေထဲမှာ ဗုဒ္ဓနဲ့ အင်မတန်
ရုပ်ချင်းတူတဲ့ ချစ်ဖွယ် သာမဏေငယ်တစ်ပါး ပါတယ်။
“ဥပရေဝတ” ဘွဲ့မည်ရှိတဲ့ ဒီသာမဏေဟာ ဗုဒ္ဓရဲ့
သားတော်ဖြစ်ကြောင်း သိသွားတဲ့အခါ နဂါးမင်းဟာ
သာမဏေကို အလွန် ကြည်ညို စွဲလမ်းသွားပြီး
သိကြားမင်းအဖြစ် ဆုမတောင်းတော့ဘဲ ဗုဒ္ဓရဲ့
သားတော်ဖြစ်လိုကြောင်း ဆုပန်တယ်။
(အံ-ဋ္ဌ ၁၊ ၁၉၇။)
ဘုရားသီတင်းသုံးတဲ့ ကျောင်းတော်မှာ ကြေးမုံအခင်း
(မှန်စီအခင်း)ကိုလည်း လှူဒါန်းတယ်။
(အပါဒန ၁၊ စာ-၆၆)။
“သိကြားမင်း”
••••••••••••••••
နောက်တစ်ကြိမ် သိကြားမင်းဆီကို အခစားသွားတဲ့အခါ
နဂါးမင်းက မိမိတောင်းခဲ့တဲ့ဆုကို ပြောပြတဲ့အတွက်
ဘဝသံသရာမှာ ချစ်သူငယ်ချင်း နှစ်ယောက် ပြန်
ဆုံစည်းနိုင်ဖို့ ရည်ရွယ်ပြီး သိကြားမင်းလည်း မြတ်စွာဘုရားနဲ့
သံဃာတွေကို အလှူဒါနပြုတဲ့အခါ “သဒ္ဓါပဗ္ဗဇိတ” ဧတဒဂ်
(ဗုဒ္ဓသာသနာကို ကြည်ညိုလို့ ရဟန်းပြုလာသူတွေထဲမှာ
အမြတ်ဆုံး) ဘွဲ့ရတဲ့ ရဟန္တာ တစ်ပါးကို အားကျလို့
ထိုမထေရ်လို ဖြစ်ဖို့ ဆုတောင်းတယ်။
ပဒုမုတ္တရ မြတ်စွာဘုရားဟာ သူငယ်ချင်းနှစ်ယောက်ရဲ့
ပြုပြီးတဲ့ ကောင်းမှုအထူးကို မြင်တော်မူလို့
“နဂါးမင်း” က “ဂေါတမဗုဒ္ဓရဲ့ သားတော်”၊
“သိကြားမင်း” က ထိုဂေါတမဗုဒ္ဓသာသနာမှာပဲ “သဒ္ဓါပဗ္ဗဇိတ
ဧတဒဂ်ရတဲ့ ရဟန္တာ” ဖြစ်မယ်လို့ ဗျာဒိတ် ချွေတော်မူပါတယ်။
ဒီဖြစ်ရပ် နှစ်ခုက ဒီကမ္ဘာမတိုင်ခင် ကမ္ဘာတစ်သိန်း
အလွန်က ဖြစ်ခဲ့တဲ့ ဖြစ်ရပ်ပါ။
ဂေါတမဗုဒ္ဓသာသနာမှာတော့ နဂါးမင်းက ဗုဒ္ဓလောင်းလျာ
မင်းသိဒ္ဓတ်ရဲ့ သားတော် အရှင်ရာဟုလာ၊
သိကြားမင်းက သူဌေးသား ဧတဒဂ်ရှင် အရှင်ရဋ္ဌပါလ
ဖြစ်လာပါတယ် (အံ-ဋ္ဌ ၁၊ ၁၉၇)။
“ရှင်ရာဟုလာ”
••••••••••••••••
ဗုဒ္ဓလောင်းလျာ မင်းသိဒ္ဓတ် တောထွက်မယ့်နေ့မှာ
သားတော် ရာဟုလာကို မွေးဖွားခဲ့တယ် (အံ-ဋ္ဌ ၁၊ ၁၁၂)။
အဲဒီနောက် ခုနစ်နှစ်အကြာ မင်းသိဒ္ဓတ် ဗုဒ္ဓဖြစ်တဲ့အခါ
ခမည်းတော် သုဒ္ဓေါဒနမင်း ပင့်ဖိတ်လို့ မွေးရပ်မြေ
ကပိလဝတ္ထုကို ပထမဆုံးအကြိမ် ကြွစဉ်မှာ ယသော်ဓရာ
မိဖုရားက သားတော်ကို ဗုဒ္ဓထံမှ အမွေတောင်းခိုင်းတယ်။
မြတ်ဗုဒ္ဓ ကျောင်းကို အပြန်မှာ အမွေတောင်းရင်း
နောက်ကလိုက်လာတဲ့ ရာဟုလာကို လောကီအမွေကို
မပေးဘဲ လောကုတ္တရာ အမွေကို ပေးတဲ့အနေနဲ့
သားတော်ကို ရှင်ပြုပေးဖို့ အရှင်သာရိပုတြာကို
မိန့်တော်မူပါတယ်။
အရှင်မဟာမောဂ္ဂလ္လာန်က ခေါင်းရိတ်၊ သင်္ကန်းဝတ်ပေးပြီး
သရဏဂုံ ပေးတယ်။အရှင်မဟာကဿပက ရှင်ရာဟုလာကို
သာမဏေတို့ ကျင့်ဝတ်ကို သင်ကြားပေးပါတယ်။
အရှင်သာရိပုတ္တရာကတော့ ရှင်ရာဟုလာကို အနီးကပ်
ဆုံးမပေးရတဲ့ ဥပဇ္ဈာယ်ဆရာ ဖြစ်ပါတယ်။
ဗုဒ္ဓရဲ့ ခမည်းတော် တောင်းပန်မှုအရ အဲဒီအချိန်က
စပြီး မိဘခွင့်မပြုသူကို ရှင်ရဟန်း ပြုမပေးရတော့ဘူး ။
(ဝိ-ဋ္ဌ ၃၊ ၂၉၁)။
“ဗုဒ္ဓ နှင့်အတူ”
••••••••••••••••
ရှင်ရာဟုလာ ရှင်ပြုပြီးသည်နဲ့ ဗုဒ္ဓရှင်တော်မြတ်က မပြတ်မလပ်
ဩဝါဒ ပေးပြီးသုတ္တန် များစွာ ဟောကြားတော်မူတယ်။
တစ်ချို့ ဩဝါဒတွေကို ထပ်ခါထပ်ခါ ပေးတော်မူတယ်။
ရှင်ရာဟုလာ အသက် ၇ နှစ်အရွယ်မှာ ပျော်စေ ပျက်စေ
သဘောနဲ့ပင် လိမ်ညာ ပြောဆိုတာကို ရှောင်ကြဉ်တတ်အောင်
ရည်ရွယ်ပြီး ဗုဒ္ဓက “အမ္ဗလဋ္ဌိကရာဟုလောဝါဒ သုတ်”ကို
ဟောကြားပါတယ်။
ငယ်စဉ်ကပင် မလိမ်တတ်အောင် လေ့ကျင့် သင်ကြား
ပေးတာဟာ ရှင်ရာဟုလာက အစပြုခဲ့တာပါ။
ရှင်ရာဟုလာ အသက် ၁၈ နှစ် အရွယ်မှာ ဗုဒ္ဓရှင်တော်မြတ်
နဲ့အတူ ဆွမ်းခံလှည့်လည်ရင်း ခမည်းတော်ဗုဒ္ဓနဲ့
မိမိကိုယ်တိုင်ရဲ့ ဥပဓိသမ္ပတ္တိ(ရုပ်ဆင်းအင်္ဂါသပ္ပာယ်မှု)ကို
အကြောင်းပြုပြီး ဆွေမျိုး၊မိဘချစ်စိတ်မျိုး တွေးကြံမိလို့
ဗုဒ္ဓရှင်တော်မြတ်က မဟာရာဟုလောဝါဒသုတ်ကို ဟောပြီး
အဲဒီစိတ်မျိုးမဖြစ်အောင် ဩဝါဒ ပေးတော်မူပါတယ်။
ထိုအစွဲကြောင့်ပဲ ဒီအချိန်ထိ တစ်မဂ် တစ်ဖိုလ်ကို
မရနိုင်ခဲ့ဘူး။(သုတ္တနိ-ဋ္ဌ ၂၊ ၇၃)။
“ရဟန္တာဖြစ်ပြီ”
••••••••••••••••
ရှင်ရာဟုလာဟာ အသက် ၂၀ ပြည့်ခါနီးမှာ ရဟန်း
ဖြစ်ပုံရပါတယ်။ အဋ္ဌကထာ (သုတ္တနိ-ဋ္ဌ ၂၊ ၇၄) မှာတော့
အရွယ်ရောက်လာတဲ့ ရှင်ရာဟုလာကို
အရှင်သာရိပုတ္တရာကပဲ ဥပဇ္ဈာယ်ဆရာပြုပြီး
ရဟန်းပြုပေးတယ်။အရှင်မောဂ္ဂလ္လာန်ကတော့
ကမ္မဝါစာဆရာ ဖြစ်တယ်လို့ သာမန်ပဲ ဆိုပါတယ်။
ရဟန်းဖြစ်ပြီးနောက်မှ အရှင်မြတ်ကို ဝိပဿနာရှုမှတ်ပုံ ကို
သင်ကြားတဲ့အနေနဲ့ ရာဟုလောဝါဒသုတ္တန်
(အံ ၁၊၄၈၃။ သံ ၂၊ ၃၂၄) တွေကို ဗုဒ္ဓ ဟောကြားတော်မူတယ်။
အရှင်ရာဟုလာ ရဟန်းဖြစ်ပြီးစ ဝါမရသေးခင်မှာ
ဗုဒ္ဓရှင်တော်မြတ်ဟာ အရှင်မြတ်ရဲ့ စိတ်ဓာတ်
ရင့်ကျက်လာတာကို သိတဲ့အတွက် အရှင်မြတ်နဲ့အတူ
အန္ဓဝနကို နှစ်ပါးတည်းကြွပြီး အဲဒီမှာ
“စူဠရာဟုလော ဝါဒသုတ်” ကို ဟောပါတယ်။
ယင်းသုတ်အဆုံးမှာ အရှင်ရာဟုလာ
ရဟန္တာ ဖြစ်သွားတယ်။
တရားနာတဲ့ ထောင်ပေါင်းများစွာသော
နတ်ဒေဝါတွေလည်း မဂ်ပေါက်ဖိုလ်ဝင် ဖြစ်သွားကြတယ်။
ဒီနတ်ဒေဝါတွေဟာ ပဒုမုတ္တရဘုရား လက်ထက်တုန်းက
အရှင်ရာဟုလာ လောင်းလျာ နဂါးမင်း ဗုဒ္ဓရဲ့
သားတော်ဖြစ်ဖို့ ဆုပန်စဉ် ကြားလိုက်ကြတဲ့
မိတ်ဟောင်း တွေဖြစ်တယ်။
သူတို့အားလုံး အရှင်ရာဟုလာ ရဟန္တာဖြစ်မယ့်နေ့မှာ
အန္ဓဝနမှာ စုဝေးရောက်လာကြသတဲ့ (သံ-ဋ္ဌ ၃၊ ၃၇)။
“မာရ်နတ်ရဲ့ အကြံ”
••••••••••••••••••••••••••••••••
အရှင်ရာဟုလာဟာ ရဟန္တာ ဖြစ်ပြီးလို့ ဝါမရခင် ညတစ်ညမှာ
ကျိန်းစရာ နေရာ မရှိလို့ ဇေတဝန်ကျောင်းတိုက်အတွင်း
ဗုဒ္ဓသီတင်းသုံးတဲ့ ဂန္ဓကုဋိ ရှေ့နားက လွင်
တီးခေါင်မှာ ကျိန်းရတယ်။ ညကျတော့ မာနတ်ဟာ
ဧရာမဆင်ကြီးယောင် ဆောင်ပြီး အရှင်ရာဟုလာကို
ခြောက်လှန့်ဖို့ လာသတဲ့။ ဒါပေမယ့် ဗုဒ္ဓက
“ရာဟုလာဟာ ဒေါသကုန်ပြီဖြစ်လို့ နင်လို ကောင်မျိုး
တစ်သိန်းမက လာခြောက်လည်း မကြောက်တော့ကြာင်း၊
အရှင်မြတ်ဟာ ဝိပဿနာပညာနှင့် ပြည့်စုံကြောင်း”
ကြိုပြီး တရားဟောလွှတ်လိုက်လို့ မာရ်နတ်ကြီး
တပ်ခေါက် ပြန်ခဲ့ရတယ် (ဓမ္မပဒ-ဋ္ဌ ၂၊ ၃၄၆)။
(သီဟိုဠ်မူမှာ အဝဿိကောဝ ပုဒ်အစား
အဋ္ဌဝဿိကောဝလို့ ရှိနေပုံပါပဲ။ ဒီအလို အရှင်ရာဟုလာ
ရဟန္တာ ဖြစ်လို့ ရှစ်နှစ်အကြာမှာ ဒီကိစ္စဖြစ်တယ်
ဆိုရလိမ့်မယ်။)
“ဆရာနဲ့အတူ အဆဲခံရပုံ”
•••••••••••••••••••••••••••
တစ်ခါမှာ အရှင်သာရိပုတ္တရာဟာ နောက်ပါ သံဃာငါးရာ
နှင့်အတူ မွေးရပ်မြေ နာလကရွာက မိခင်ရဲ့အိမ်ရှေ့မှာ
ဆွမ်းခံရပ်သတဲ့။ မယ်တော်ကြီးက အရှင်သာရိပုတ္တရာနဲ့
သံဃာတွေကို ဆွမ်းတော့ လောင်းတယ်။
ဒါပေမယ့် ပါးစပ်က တစ်ဖျစ်တောက်တောက်
မြည်တွန် ဆဲဆိုတယ်။ အဲဒီအချိန်မှာ အရှင်ရာဟုလာ
လည်းပါလို့ ကျောင်းပြန်ရောက်တော့ မြတ်စွာဘုရားက
အရှင်ရာဟုလာကို မေးတယ် -
“ဒီနေ့ ဘယ်ကို ဆွမ်းခံကြွသလဲ”။
“ဒကာမကြီး (အရှင်သာရိပုတ္တရာရဲ့ မယ်
တော်ကို ရည်ညွှန်းတယ်) အိမ်ကိုပါဘုရား”။
“သင့်ဒကာမကြီးက သင့်ရဲ့ ဥပဇ္ဈာယ်ဆရာ
(အရှင်သာရိပုတ္တရာကို ညွှန်းတယ်)ကို ဘာပြောလဲ”။
“ဒကာမကြီးက တပည့်တော်ရဲ့ ဥပဇ္ဈာယ်ဆရာကို
ဆဲဆိုပါသည် (အက္ကုဋ္ဌော)”။
“ဘယ်လို ဆဲဆိုတုန်း”။
“သူတောင်းစား၊ ခုလို တောင်းစားမလို့ ဒီက
ကုဋေရှစ်ဆယ်ကို စွန့်ရက်ပလေလို့ ဆဲဆိုပါတယ်”။
“သင့် ဥပဇ္ဈာယ်ဆရာက ဘာပြန်ပြာလဲ”။
“ဘာမှ ပြန် မပြောပါ”။
အဲဒါကို အကြောင်းပြုပြီး ရဟန္တာဆိုတာ စိတ်ဆိုး
အမျက်ထွက်မှုကို ထွေးအန်ပြီးပြီလို့ မြတ်ဗုဒ္ဓက
ရဟန်းတွေကို ဟောတော်မူတယ်
(ဓမ္မပဒ-ဋ္ဌ ၂၊ ၄၀၉)။
“ကံကောင်းသူ”
•••••••••••••••••••••••
အရှင်ရာဟုလာဟာ ရဟန်းတော်တွေ ကြားထဲမှာ ရာဟုလဘဒ္ဒ
(ကံကောင်းတဲ့ ရာဟုလာ)လို့ ထင်ရှားတယ်။
အဲဒီလို ခေါ်ခံရတာနဲ့ ပတ်သက်လို့ အရှင်မြတ်က
“ဗုဒ္ဓသားတော်ဖြစ်ခြင်း နဲ့ ရဟန္တာ”ဖြစ်ခြင်းဆိုတဲ့
အကြောင်းနှစ်ပါးကြောင့် အဲဒီနာမည် ကို ရထိုက်ပါသည်။
(ထေရ၊ ၂၉၅ ဂါထာ)တဲ့။ ဗုဒ္ဓရှင်တော်မြတ် အနေနဲ့
တော့ ဒေဝဒတ္တ၊ အင်္ဂုလိမာလနဲ့ ဓနပါလ (ဆင်ပြောင်)တို့
အပေါ်နဲ့ အရှင်ရာဟုလာ အပေါ် ထားရှိတဲ့
မေတ္တာဟာ အတူတူပါပဲ
(သုတ္တနိ-ဋ္ဌ ၁၊ ၂၀ဝ။ မိလိန္ဒ၊ ၄၁၀)။
အရှင်ရာဟုလာ ဟောကြားတာ ထေရဂါထာမှာ လေးဂါထာ
(ဂါထာအမှတ် ၂၉၅ မှ ၂၉၈ ထိ) တွေ့ရတယ်။
မိလိန္ဒပဥှာမှာတော့ အရှင်ရာဟုလာ ဟောတဲ့
ဂါထာ ၅ ပုဒ် တွေ့ရတယ်။ (စာ- ၃၅၄ မှာ ၁ ဂါထာ။
၃၅၉ မှာ ၃ ဂါထာ။ ၃၉၉မှာ ၁ ဂါထာ။)
မိလိန္ဒပဥှာမှာ ပါတဲ့ အရှင်ရာဟုလာကို သားတော်
အရှင်ရာဟုလာ လို့ ဆိုနိုင်ရင် ပိဋကတ်သုံးပုံမှာ
အရှင်မြတ်ဟောတဲ့ တရားအနေနဲ့ ဂါထာ ၉ပုဒ်ရှိကြောင်း
မှတ်သင့်တယ်။
“ဗုဒ္ဓရဲ့ ကုဋီမှာ တစ်ညတာ”
•••••••••••••••••••••••••••••••••
ဗုဒ္ဓရှင်တော်မြတ် ကောသမ္ဗီမြို့ ဗဒရိကာရာမကျောင်းတိုက်
မှာ သီတင်း သုံးခိုက်အရှင်မြတ်ဟာ တစ်ညနေမှာ
ကောသမ္ဗီကို ရောက်လာတယ်။
ထိုအချိန်က ရဟန်းတော်တစ်ပါးဟာ သာမဏေနဲ့အတူ
တစ်မိုးတစ်ရံ တည်းသောကျောင်းမှာ အတူမအိပ်ရဆိုတဲ့
သိက္ခာပုဒ်ကို ပညတ်ထားခါစ ဖြစ်တယ်။
ထိုအချိန်က ညကျိန်းစက်ဖို့ နေရာမရှိတဲ့အတွက်
အရှင်ရာဟုလာဟာ ဗုဒ္ဓအသုံးပြုတဲ့ ကုဋိ(အိမ်သာ)ထဲမှာ
ကျိန်းစက်ရတယ်။ (ဗုဒ္ဓသုံးတဲ့ ကုဋိဆိုတာ တံခါးရှိတယ်၊
နံ့သာတွေ ပန်းတွေနဲ့ ထုံမွှမ်းထားပြီး စေတီတိုက်ခန်းနဲ့
အတူတူပဲ၊ တစ်ခြားပုဂ္ဂိုလ်တွေ မသုံးဆောင် ကောင်းဘူး။
ဝိ-ဋ္ဌ ၃၊ ၁၀။ တစ်ညလုံး ဆီးမီးတိုင် ထွန်းထားတယ်၊
ဇာ-ဋ္ဌ ၁၊၁၇၇)။
နံနက်လင်းလို့ ဗုဒ္ဓရှင်တော်မြတ် ရေအိမ်ဝင်တဲ့အခါ
အရှင်ရာဟုလာကို တွေ့လို့ ဗုဒ္ဓက သိက္ခာပုဒ်မှာ
ချွင်းချက်စာသား ပြန်ထည့်ရတယ်။
ဒီကိစ္စနဲ့ ပတ်သက်ပြီး ဗုဒ္ဓရှင်တော်မြတ်က
အရှင်သာရိပုတ္တရာကို ပြစ်တင်တော်မူတယ်။
“ချစ်သား သာရိပုတ္တရာ၊ ရာဟုလာကို သင်ကိုယ်တိုင်
ရှင်ပြု ရဟန်းခံပေးပြီး ယခုလို ပစ်ထားရင် အခြား
အမျိုးကောင်း သားလေးတွေကို ရဟန်းပြုပေးပြီး
ဘယ်လိုများ ကိုင်တွယ် ဆောင်ရွက်ပါ့မလဲ”တဲ့
(ဇာ-ဋ္ဌ ၁၊ ၁၇၇)။
“ဧတဒဂ်ဘွဲ့”
••••••••••••••••
အရှင်ရာဟုလာဟာ သာမဏေဘဝနဲ့ ကတည်းကပင်
ဗုဒ္ဓနှင့် မိမိရဲ့ ဆရာသခင်တွေထံမှ သင်ကြားချက်တွေကို
ရလိုစိတ် အင်မတန် ပြင်းပြတယ်။
မနက်လင်းတာနဲ့ လက်တစ်ဆုပ်စာ သဲကို ကောက်ယူပြီး
“ငါ့ဆရာတွေဆီက ဤလက်ထဲက သဲလုံးများ ပမာဏရှိတဲ့
ဩဝါဒစကားတွေကို ငါရနိုင်ပါစေ” လို့ မြွက်ဆိုလေ့ရှိတယ်။
အင်မတန် ဆုံးမ လွယ်တာနဲ့ ပတ်သက်ပြီး
ရဟန်းတော်တွေက ရှင်ရာဟုလာကို ချီးမွမ်းစကား
ဆိုနေကြခိုက်မှာ ဗုဒ္ဓကြွလာပြီး ယခင်
ဘဝတွေတုန်းကလည်း နားထောင်လွယ်တဲ့
“သုဝစ” ဂုဏ်ရှိခဲ့ကြောင်း တိပလ္လတ္ထမိဂဇာတ်နဲ့
တိတ္တိရဇာတ်တွေကို ဗုဒ္ဓ ဟောကြားတယ်။
နောင်အခါ အရိယာသံဃာ့ ပရိသတ်အလယ်မှာ
အရှင်ရာဟုလာကို ဗုဒ္ဓရှင်တော်မြတ်က
“အကျင့်သိက္ခာကို ကျင့်လိုသူတွေအနက် အရှင်ရာဟုလာဟာ
အသာဆုံး အမြတ်ဆုံးဖြစ်၏” လို့ ဧတဒဂ်ဘွဲ့
ချီးမြှင့်တော်မူတယ်။(အံ-ဋ္ဌ ၁၊ ၂၀၂)။
“ပရိနိဗ္ဗာန်စံခြင်း”
••••••••••••••••
အရှင်ရာဟုလာဟာ ဗုဒ္ဓနဲ့ အရှင်သာရိပုတ္တရာတို့ထက်
အရင် စောပြီး ပရိနိဗ္ဗာန်စံတယ်။ တာဝတိံသာ နတ်ပြည်မှာ
စံလွန်တယ် (ဒီ-ဋ္ဌ ၂၊ ၅၄၀)။
ဗုဒ္ဓရဲ့ သက်တော်၂၉ မှာ မွေးဖွားတာဖြစ်လို့ အရှင်ရာဟုလာ
ပရိနိဗ္ဗာန် စံလွန်ချိန်မှာ သက်တော်၅၀ ထက် မကြီးနိုင်ပါဘူး။
သက်တော် ငယ်ငယ်ရွယ်ရွယ်နဲ့ ပရိနိဗ္ဗာန်စံလွန်
တော်မူပါတယ်။ ဒါကြောင့် ပထမသံဂါယနာမှာ
အရှင်ရာဟုလာ မပါနိုင်တော့ဘူး။
အရှင်မြတ်ဟာ ၁၂ နှစ်ပတ်လုံး အိပ်ရာပေါ်မှာ
ကျောချ မအိပ်ဘဲ နိသဇ္ဇဓုတင် ဆောက်တည်ခဲ့တယ်။
(ဒီ-ဋ္ဌ ၂၊ ၃၂၉)။
ဘီစီ ၃ ရာစုမှာ အိန္ဒိယဧကရာဇ် “ဘုရင်အသောက”ဟာ
ရှင်သာမဏေတွေ ရှိခိုးဝတ်ပြုဖို့ ရည်ရွယ်ပြီး
အရှင်ရာဟုလာအမှတ်တရ စေတီတစ်ဆူ
တည်ထားခဲ့ပါသတဲ့ ။
(Beal, Buddhist Records of the
Western World I , 180-181)
“အရှင်ရာဟုလာ၏တရား”
••••••••••••••••••••••••••••••••
သာလကလျာဏီမည်သော သစ်ပင်သည် မြေကြီး၏
အတွင်း၌ပင် အတောင်တစ်ရာတိုင် ကြီးထွား၏။
ဘုရားပွင့်ချိန်၌ ထိုသစ်ပင်သည် ကြီးရင့်ပြီး (မြေပြင်)
အထက်သို့ တက်လျက် တစ်ရက်မျှဖြင့်ပင် အတောင်တစ်ရာ
မြင့်တက်သကဲ့သို့ ဤအတူသာလျှင် လုံ့လကြီးတော်မူသော
မြတ်စွာဘုရား၊ အကျွန်ုပ်သည် ဆိတ်ငြိမ်အရပ်တွင်
အတွင်းသန္တာန်၌ တရားဖြင့် တိုးပွားရပါပြီ။
လောကအာမိသကို စွန့်သောကြောင့် သုညတမဂ်၊
အနိမိတ္တမဂ်၊ ဝိမောက္ခမဂ်၊အပ္ပဏိဟိတမဂ်၊ ဖိုလ်လေးပါး
နှင့် အဘ်ိညာဉ် ခြောက်ပါးတို့ကို ရနိုင်၏။
(မိလိန္ဒ၊၃၅၉။ ၃၉၉။)
ဗုဒ္ဓ၏ သားတော်စစ် ဖြစ်ခြင်း၊ သစ္စာလေးပါးကို မဂ်ပညာနှင့်
သိခြင်း ဟူသော အကြောင်း နှစ်ပါးကြောင့် ပညာရှိတို့က
ငါ့ကို “ရာဟုလဘဒ္ဒ”လို့ သိကြပါ၏။
အာသဝေါ ကုန်ပြီ၊ ဘဝသစ် တစ်ဖန် မဖြစ်တော့ချေ။
သံသရာစက်၏ အကန့်များကို ဖျက်ဆီးပြီးဖြစ်၍ မြတ်သော
အလှူကို ခံထိုက်သူ၊ ဝိဇ္ဇာသုံးပါးနှင့် ပြည့်စုံသူ ဖြစ်ပါ၏။
သတ္တဝါတို့သည် ကာမကြောင့် ကန်းနေကြ၏။
တဏှာကွန်ရက်ဖြင့် ဖုံးလွှမ်းခံနေရ၏။
တဏှာဖြင့် အုပ်မိုးခံနေရ၏။
မြှုံးဝမှာ ဖွဲ့မိနေသော ငါးကဲ့သို့ မာရ်၏ အနှောင်အဖွဲ့
ခံနေကြရ၏။ငါမူကား ထိုကာမနှောင်အဖွဲ့ကို ပယ်ပြီး၊
ကိလေသာမာရ်အဖွဲ့ကို အရဟတ္တမဂ်ဖြင့် အကြွင်းမဲ့ ဖြတ်၍၊
အဝိဇ္ဇာကို အမြစ်ပါမကျန် ပယ်နုတ်လျက် ငြိမ်အေးပြီသူ
ဖြစ်ပါ၏။ (ထေရဂါထာ၊ ၂၉၅-၂၉၈)။
ယစ်မသည် အဥကို စောင့်သကဲ့သို့၊
စာမရီသားကောင်သည် အမြီးကို ကာကွယ်သကဲ့သို့
ထိုအတူ ရင့်ကျက်သော ပညာနှင့် ပြည့်စုံသော ငါသည်
သီလကို စောင့်ရှောက်ပါ၏။
ငါသည် မြတ်စွာဘုရား၏ တရားတော်ကိုသိ၍
သာနာတော်၌ မွေ့လျော်လျက်နေပါ၏။
အလုံးစုံသော အာသဝေါတရားတို့ကို ပိုင်းခြားသိ၍ အာသဝ
ကင်းကွာကိလေသမရှိဘဲ နေရ၏။
ပဋိသမ္ဘိဒါလေးပါး၊ ဝိမောက္ခရှစ်ပါး၊ အဘိညာဉ် ခြောက်ပါးတို့ကို
မျက်မှောက်ပြုပါပြီ၊ မြတ်စွာဘုရား၏ အဆုံးအမတော်ကို
လိုက်နာ ကျင့်သုံးပြီးပါပြီ။
(အပဒါန။ စာ- ၆၈)။
-【စာရိုက်ပူဇော်သူ - Admin Team of
Young Buddhist's Association】
-【ဆရာတော်အရှင်ကေလာသ】
Posted by►
www.facebook.com/youngbuddhistassociation.mm