■ သေချင်လောက်အောင်ထိ ဆိုးနေတဲ့ကံကို

■ ကုသိုလ် (၅)မျိုးနဲ့ ပြုပြင်ယူလို့ ရပါတယ်။

■ တိုက်တွန်း စကားအနေနဲ့ ပြောရရင်တော့
သေချင်လောက်အောင် ဆိုးနေတဲ့ကံကို
ကုသိုလ် (၅)မျိုးနဲ့ နေ့စဉ် ပြုပြင်ပစ်လိုက်စမ်းပါ။
ဆိုးနေတဲ့ ကံ " နင်နေ ငါသွား ” ဖြစ်သွား ပါလိမ့်မယ်။

အဲဒီ ကုသိုလ် (၅)မျိုး ကတော့

၁။ ဒါန

၂။ သီလ

၃။ ဂုဏ်တော်

၄။ မေတ္တာ

၅။ ၀ိပဿနာ တို့ဖြစ်ပါတယ်။

- အဲဒီ ကုသိုလ် (၅)မျိုးကို နေ့စဉ် ဖြစ်စေရမယ်လို့

- အဓိဋ္ဌာန်ပြီး နေ့စဉ် ပြုလုပ် သွားဖို့ပါပဲ။

- ငါးမျိုးကုသိုလ် ဘယ်လိုပြုရမယ်။

¤¤¤¤¤
၁။ ဒါန
¤¤¤¤¤

- ပထမဆုံး ကုသိုလ်က ဒါန ပါ။

- ဒါန ဆိုတဲ့နေရာမှာ ရှင်တစ်သောင်းပြုပေးနိုင်မှ၊

- ကျောင်းကြီးတွေ ဆောက်လုပ် လှူဒါန်းနိုင်မှ

- ဒါန မဟုတ်ပါဘူး။

- အိမ်မှာရှိတဲ့ ဘုရားကို ရေချမ်း ကပ်လိုက်မယ် ဆိုလည်း ဒါန ဖြစ်သွားတာပါပဲ။

- ကိုယ်ထမင်းချက်မယ့် ဆန်ထဲက လက်တစ်ဆုတ်စာလောက်နှိုက်ပြီး အိမ်ရှေ့က စာကလေးတွေ ခိုကလေးတွေကို ပစ်ကျွေးလိုက်မယ် ဆိုရင်လည်း ဒါန ဖြစ်သွားတာပါပဲ။

- ဆန်လက် တစ်ဆုတ် လောက်နဲ့တော့ မိသားစု ထမင်းဝိုင်းကို သိပ်ပြီးလည်း မထိခိုက်စေ ပါဘူး။

- နေ့စဉ် လက်တစ်ဆုတ် စာလောက် စာကလေးတွေကို ကျွေးနေမယ် ဆိုရင်လည်း

- ကိုယ့်ဝန် ကိုယ့်အားနဲ့ မျှတဲ့ ဒါန ဖြစ်နေတာပါ။

¤¤¤¤¤¤
၂။ သီလ
¤¤¤¤¤¤

- ဒုတိယက သီလ ပါ။

- သီလမှာလည်း လောကီထဲမှာနေတဲ့ လူတစ်ယောက် အတွက်

- ငါးပါးသီလလောက် လုံခြုံအောင် စောင့်ထိန်း လိုက်နိုင်တယ် ဆိုရင်ပဲ တော်တော် လုံလောက်နေပါပြီ။

- တစ်ဆင့်တက်ပြီး ဥပုသ်နေ့တွေမှာ

- (၈)ပါး သီလ၊ (၉)ပါး သီလကို စောင့်ထိန်း နိုင်ရင်တော့ အကောင်းဆုံးပေါ့။

- သီလကို စောင့်ရှောက်တဲ့ အတွက်

- သီလ ကလည်း ကိုယ့်ကို သူ့သတ္တိ အားလျော်စွာ ပြန်စောင့်ရှောက် ပါလိမ့်မယ်။

¤¤¤¤¤¤¤¤¤
၃။ ဂုဏ်တော်
¤¤¤¤¤¤¤¤¤

- တတိယက ဂုဏ်တော် ပါ။

- ဂုဏ်တော် (၉)ပါး ထဲက

- ကို်ယ် နှစ်သက်ရာ တစ်ပါးပါးကို ပွားလို့ရပါတယ်။

- (၉) ပါးလုံး ပွားလည်း ရပါတယ် ။

- အရဟံ ဂုဏ်တော်ကိုပဲ

- အရဟံ = ပူဇော်အထူးကို ခံယူထိုက်သော မြတ်စွာဘုရား၊

- အရဟံ = ကိလေသာ ကင်းစင်တော်မူသော မြတ်စွာဘုရား၊

- အရဟံ = ဆိတ်ကွယ်ရာအရပ်၌ပင် မကောင်းမှုကို ပြုတော်မမူသော မြတ်စွာဘုရားလို့ ပွားများရပါတယ်။

- အရဟံ ဆိုတဲ့ ပါဠိလေးရယ်။

- အရဟံ ရဲ့ နောက်က အနက် သုံးမျိုးရယ်က

- ပွားလို့ ဆင်ခြင်လို့ သိပ်ကောင်းတဲ့ ပါဠိနဲ့ အနက်လေးတွေပါ။

- ဂုဏ်တော် ပွားတဲ့အတွက်

- ဂုဏ်တော်က သူ့သတ္တိ အားလျော်စွာ ပြန်စောင့်ရှောက်နေ ပါလိမ့်မယ်။

¤¤¤¤¤¤¤¤
၄။ မေတ္တာ
¤¤¤¤¤¤¤¤

- စတုတ္ထက မေတ္တာပါ။

- မေတ္တာ ပွားတဲ့နေရာမှာ ပွားနည်းတွေ ကတော့

- သီသန့်အကျယ်ကို ရှိပါတယ်။

- စာရေးသူရဲ့ မေတ္တာ အတွေးများ စာအုပ်မှာလည်း ပွားပုံ ပြည့်ပြည့်စုံစုံ ရေးပြထားပါတယ်။

- မေတ္တာပွားတဲ့ နေရာမှာ အဓိက အကြံပေးချင် တာတော့

- ပထမ ကိုယ့်အပေါ် ကျေးဇူးရှိတဲ့ ကျေးဇူးများတဲ့

- လူပုဂ္ဂိုလ် အားလုံးကို တစ်ယောက်ချင်း ကုန်အောင် ပွားပါ။

- ပြီးရင် နတ်ကောင်း နတ်မြတ်တွေ၊ ကိုယ်စောင့်နတ်၊

- အိမ်စောင့်နတ် ကစပြီး၊ လမ်းမြို့နယ်၊ မြို့၊ နိုင်ငံကို စောင့်ရှောက်နေကြသော နတ်ကောင်း နတ်မြတ်တွေ အားလုံး

- ကိုယ် ဆင်းရဲ၊ စိတ် ဆင်းရဲ ကင်းပါစေ၊ အစစအရာရာ အဆင်ပြေ ပါစေ… စသည်ဖြင့် ပေါ့လေ။

¤¤¤¤¤¤¤¤¤
၅။ ၀ိပဿနာ
¤¤¤¤¤¤¤¤¤

- နောက်ဆုံးက ၀ိပဿနာ ပါ။

- ၀ိပဿနာ ကတော့ ကိုယ်အားထုတ်ဖူးရာ

- ကိုယ် သန်ရာ သန်ရာ ကိုယ့် အာစရိယဝါဒ အတိုုင်း မှတ်ယူလို့ ရပါတယ်။

- မည်သည့် တရားစခန်း မည်သည့် အာစရိယဝါဒမျှ

သင်ကြားထားခြင်း မရှိသူများအဖို့

- အစပိုင်းတွင် တင်ပလ္လင်ခွေ(ထက်ဝယ်ဖွဲ့ခွေ)ထိုင်၊

- ဘယ်လက်ပေါ် ညာလက်ထပ်တင်၊

- ခါး၊ လည်ပင်း၊ ဦးခေါင်းကို မတ်မတ်ထား၊

- အသက်ကို ပုံမှန်ရှူလျှက်

- ဝင်လေ ဝင်လာလျှင် ဝင်လာသည်ဟု သိပေး၊

- ထွက်လေ ထွက်သွားရင် ထွက်သွားသည်ဟု သိပေးခြင်းဖြင့်

- မိမိစိတ်ကို ထိုထိုနှာသီးဝသို့သာ စူးစိုက်ရောက်ရှိစေရန် ပဏာမ လေ့ကျင့်ကြလျှက်

- (၇)ရက် စခန်း၊ (၁၀)ရက် စခန်း စသည်တို့ကို

- ဝင်ရောက်နိုင်ရန် တိုး၍ ကြိုးစား ကြသင့်ပေသည်။

¤¤¤¤¤¤¤¤¤¤¤¤¤¤¤¤¤¤
ကုသိုလ် (၅)မျိုး တစ်နေ့တာ
¤¤¤¤¤¤¤¤¤¤¤¤¤¤¤¤¤¤

■ ကဲ … စာဖတ်သူ၊ စိတ်ကူးနဲ့ပဲ ကုသိုလ်(၅)မျိုးကို စမ်းကြည့်ရအောင်ပါ။

¤¤¤¤¤¤¤¤
၁။ အိပ်ရာထ
¤¤¤¤¤¤¤¤

- မနက် အိပ်ရာက ထတာနဲ့ ကိုယ်လက် သန့်စင်ပြီး

- မိသားစု ကိစ္စတွေကို ဘာမှ မလုပ်နဲ့ဦး။

- ဘုရားခန်းကို အရင်သွားပါ။

- ဘုရား သောက်တော်ရေကို အရင်ကပ်ပါ။ (ဒါန)

- ကပ်ပြီးရင် (၅)ပါးသီလ ခံယူပါ။ (သီလ)

- အဲဒါပြီးရင် ဂုဏ်တော်ကို (၅)မိနစ် ( ဂုဏ်တော် )

- မေတ္တာကို (၅)မိနစ် ပွားပါ။ ( မေတ္တာ )

- ပြီးရင် ၀ိပဿနာ (၅)မိနစ် ပွားများပါ။ ( ၀ိပဿနာ )

- အင်မတန် နည်းပါးတဲ့ (၁၅)မိနစ် အချိန်လောက်တော့

- လူတိုင်း လုပ်နိုင်လောက်မယ် ထင်ပါတယ်။

- (၅)မိနစ်စီ ဆိုသည်မှာ အနည်းဆုံး ပြုရန်အချိန်ကို ဆိုလိုခြင်းဖြစ်ပြီး

- မိမိတို့၏ ခွန်အားအလိုက်၊ သဒ္ဓါ တရားအလိုက်

- (၁၀)မိနစ်စီ၊ နာရီဝက်စီ၊ တစ်နာရီစီ စသည်ဖြင့် အဓိဋ္ဌာန်ပြု

- နေ့ တစ်နေ့တာရဲ့ အစကို

- ကုသိုလ် (၅)မျိုးနဲ့ စလိုက်တာ ဘယ်လောက် ကျက်သရေ ရှိသွားလဲ။

- အိပ်ရာထပြီး နာရီဝက် တစ်နာရီအတွင်းမှာပဲ

- ကုသိုလ်(၅)မျိုး ရနေပါပြီ။

- အဲဒီ ကုသိုလ်(၅)မျိုး ပြုပြီးမှ

- မိသားစုကိစ္စ၊ ကိုယ့်ကိစ္စ ဝေယျာဝစ္စတွေကို ပြုလုပ်ပါ။

¤¤¤¤¤¤¤¤¤
၂။ နေ့လည်
¤¤¤¤¤¤¤¤¤

- အဲဒီလိုနဲ့ မနက်စာ စားပြီးတဲ့ အခါ

- ဆန် လက်တစ်ဆုတ် စာယူပြီး ခြံရှေ့မှာ ငှက်ကလေးတွေ အတွက် ပက်ကျွေးလိုက်ပါဦး။

- ကျွေးပြီးသွားရင် အဆစ်အနေနဲ့

- ဒီနေ့ မနက် ပြုဖြစ်ခဲ့တဲ့ ကုသိုလ်(၅)မျိုး ကိုလည်း အမျှ ပေးဝေပါတယ်။

- အမျှ အမျှ အမျှ ယူတော်မူကြပါ။ သာဓု၊ သာဓု၊ သာဓု ဆိုပြီး နတ်ကောင်း နတ်မြတ်များနဲ့တကွ ဝေနေယျ အပေါင်းကို အမျှပေးဝေလိုက် ပါဦး။

¤¤¤¤¤¤
၃။ ညပိုင်း
¤¤¤¤¤¤

- တတ်နိုင်တယ်။ အချိန်ရတယ်။ သဒ္ဓါတရားလဲ ထက်သန်လာတယ် ဆိုရင်

- ညပိုင်း ကိုးရီးယားကားလေး မလာခင်၊

- ဒါမှမဟုတ် ကိုးရီးယားကားလေး ပြီးသွားတဲ့အခါ

- ကုသိုလ် ငါးမျိုးကို မနက်ကအတိုင်း တစ်ကြိမ် ထပ်လုပ်လိုက်ပါဦး။

- နေ့စဉ် ပြုအပ်သည်။

- ဒီအတိုင်းသာ နေ့စဉ် ပြုသွားစမ်းပါ။

- ဆိုးနေတဲ့ ကံဟာ တောင်းပန်ပြီး ထွက်သွားဦးမှာပါ။

- ဒါပေမယ့် ဒီနေ့လုပ် နက်ဖြန်ဖြစ် ဆိုတဲ့ ပုံစံမျိုးတော့

- ဘယ်ဖြစ်နိုင်မှာလဲ။

- တစ်လတန်သည် တစ်နှစ်တန်သည်တော့ စွဲလုပ်ရပါမယ်။

- ရက် မပျက်အောင် အဓိဋ္ဌာန်ပြု၍ လုပ်ရပါမယ်။

- အကုသိုလ် ဆိုတဲ့ အင်းအားက ကြီးလွန်းနေရင်တော့ ချက်ခြင်းကြီး ရနိုင်မှာ မဟုတ်ပါဘူး။

- ဒါပေမယ့် ကုသိုလ် အင်အား ကောင်းလာတာနဲ့ အမျှ

- ကုသိုလ် အင်အားကို ကြည့်ပြီး လန့်ပြေးသွားမှာပါ။

- ဒါက ကံဆိုး နေတဲ့သူတွေကို ပြောတာပါ။

- ကံကောင်း နေတဲ့သူတွေ အတွက်လည်း

- အမြဲတမ်း ကံကောင်းနေအောင်

- ကုသိုလ်(၅)မျိုး နဲ့ အမြဲပြုစု စောင့်ရှောက်နေသင့် ပါတယ်။

- ဒီကုသိုလ်(၅)မျိုးနဲ့ ကံကောင်းအောင် လုပ်နေတဲ့အတွက်

- ဒုတိယဘဝ၊ တတိယဘဝ စသည်တွေမှာလည်း

- ဆက်ပြီး ကံကောင်းနေဦးမှာပါ။

- ဒုက္ခကြံရင် သစ္စာဆို။

- ဒီ ကုသိုလ် (၅)မျိုး ကို

- ကံ ကောင်းခြင်း၊ ကံ ဆိုးခြင်းကြောင့် မဟုတ်ဘဲ

- နေ့စဉ် ဝတ်တစ်ခု အနေနဲ့ ပြုရပါမယ်။

- အဲဒီလို ပြုနေစဉ် အတွင်းမှာပဲ

- ဘဝ အခက်အခဲ တစ်ခု ကြုံလာမယ်၊

- ဒါဆို ကိုယ်ပြုတဲ့ ကုသိုလ်(၅)မျိုးကို

- နေ့စဉ် အမျှ ပေးဝေနေတဲ့

- နတ်ကောင်းန တ်မြတ်တွေကို တိုင်တည်ပြီး သစ္စာ ဆိုလို့လည်း ရပါတယ်။

- " ကျွန်ှုပ်သည် ကုသိုလ်(၅ မျိုးကို နေ့စဉ်ပြုပြီး၊ နတ်ကောင်းနတ်မြတ် များကိုလည်း နေ့စဉ် အမျှပေးဝေခဲ့ပါတယ်။

ဤသစ္စာစကား မှန်ကန်ပါက ယခုတွေ့ကြုံနေရသော အခက်အခဲများ ပြေပျောက် ပါစေသတည်း။

- နတ်ကောင်း နတ်မြတ်တို့က ကူညီမစတော်မူပါ " စသည်ဖြင့်ပေါ့လေ…..

- သံသရာ ကပင် ကျွတ်နိုင်ရဲ့

- ကုသိုလ် (၅)မျိုး ထဲမှာ ၀ိပဿနာလည်း ပါနေတော့

- တရားမှတ်ရင် ပါရမီ ပါခဲ့ရင်

- တစ်မဂ် တစ်ဖိုလ်မှသည် လေးမဂ်၊ လေးဖိုလ် အထိ

- တရားထူး တရားမြတ်တွေ ရသွားပြီး

- သံသရာဝဋ်က ကျွတ်သွားနိုင်ပါသေးတယ်။

- ကုသိုလ် (၅)မျိုးကို ဘယ်အဆင့်အထိ ပြုရမလဲ ဆိုရင်

- ည အိပ်ရာ ဝင်လို့မှ ဒီနေ့ တစ်နေ့တာ အတွက်

- ကုသိုလ် ၅မျိုး မပြုရသေးရင်

- အိပ်လို့ လုံးဝ မပျော်တဲ့ အဆင့်

- ချက်ခြင်း ထလုပ်လိုက်မှ အိပ်ပျော်တယ် အိပ်လို့ရတယ် ဆိုတဲ့ အဆင့်ထိ ပြုလုပ်ကြရပါမယ်။

- ကဲ …. စာဖတ်သူ … ၊

- ကံ နဲ့ ပတ်သက်လို့ သေချင်လောက်အောင် ဆိုးနေပါစေ။

- ကုသိုလ် (၅)မျိုးနဲ့သာ နေ့စဉ် ပြုပြင် လိုက်စမ်းပါ။

- မကြာခင် ကံကောင်းလာပါလိမ့်မယ်။

အရှင်ရာဇိန္ဒ (ရဝေနွယ်- အင်းမ)
‪#‎ကျမ်းကိုး‬(မဟာဝင်ဝတ္ထု-ကျီးသဲလေးထပ်ဆရာတော်)