ပုထုဇဉ်လူသားအပေါင်းတို့သည် နေ့စဉ်နှင့်အမျှ စား၊ ဝတ်၊ နေ၊ ရေး အရေးကြီးသုံးပါးကို ဆောင်ရွက်နေကြ၏။

ဉာဏလုပ်သားများကလည်း ဉာဏအလျှောက် ကာယလုပ်သားများကလည်း ကာယအလျှောက် လုပ်ကိုင်နေထိုင်ကြရ၏။

ထိုအလုပ်ခွင်တွင် ကာယလုပ်သားပဲဖြစ်ဖြစ်၊ ဉာဏလုပ်သားပဲဖြစ်ဖြစ်၊ အကုသိုလ်စိတ်ရိုင်းများ မဝင်စေရန် ဗုဒ္ဓဂုဏ်တော်တစ်ခုခုကို စိတ်ထဲမှာ ပွားနေလျှင် ကုသိုလ်စိတ်တွေဖြစ်ပြီး အလွန်အကျိုးထူးများရရှိပါ၏။ စာရေးသူ၏ တူမလေး ကျောင်းဆရာမလေးခေါ် အေးကျော့သည် စာသင်ခန်းထဲမှာပဲဖြစ်ဖြစ်၊ အနားယူခန်းမှာပဲဖြစ်ဖြစ် ဗုဒ္ဓ၏ အရဟံဂုဏ်တော်ကိုပဲ အမြဲပွားများနေတတ်၏။

ယင်းအကျိုးကျေးဇူးကြောင့် အိမ်ထောင်ကျသောအခါမှာလည်း သူတော်ကောင်းတရားကို လက်ကိုင်ထားသူ အများအကျိုးကိုဆောင်ရွက်တတ်သူ ပညာရေးမှူးတစ်ဦးဖြင့် အိမ်ထောင်ကျခဲ့ရ၏။

အိမ်ထောင်ကျပြီးတော့ သားကောင်းရတနာ (၃)ဦးကို ရရှိခဲ့ပြန်၏။ အကြီးဆုံးသော သားရတနာက ဝိဇ္ဇာဘွဲ့နှင့် ဓမ္မစရိယတန်းအောင်မြင်ပြီး ပရိယတ္တိစာသင်တိုက်ကြီးတစ်တိုက်မှာ ပဓာန၊ နာယကဆရာတော်တစ်ပါး ဖြစ်နေ၏။

သားလတ်မှာ တပ်မတော်တွင် ဗိုလ်ကြီးအဆင့်ရာထူးဖြင့် အမှူထမ်းဆောင်နေပါ၏။ သားငယ်ကတော့ အိမ်ထောင်မပြုပဲ မိခင်ကြီးကို စောင့်ရှောက်ပြုစုနေပါ၏။ ဤကား မြတ်ဗုဒ္ဓ၏ အရဟံဂုဏ်တော်တစ်ပါးပင် ဖြစ်ပါသေး၏။ မြတ်ဗုဒ္ဓ၏ ဂုဏ်တော်တစ်ပါးစီကိုပွားရသော အကျိုးကျေးဇူးများကို ဖော်ပြပါမည်။

၁။ အရဟံ ဂုဏ်တော် ပွားလျှင်၊ ဘေးရန်ကင်းကျန်းမာ၏၊ လာဘ်လာပေါများ၏၊ နေရာထိုင်ခင်းကောင်းကောင်း နေထိုင်ရ၏။

၂။ သမ္မာသမ္ဗုဒ္ဓေါဂုဏ်တော်ကို ပွားများလျှင်၊ စိတ်ရွှင်လန်း၏၊ ဉာဏ်ပွင့်လင်း၏၊ စာမေးပွဲတွေ လွယ်လွယ်ကူကူအောင်မြင်၏။

၃။ ဝိဇ္ဇာစရဏသမ္ပန္နာဂုဏ်တော် ပွားလျှင်၊ ဝိဇ္ဇာပညာဖြင့် အသက်မွေးရ၏၊ ပြိုင်ဘက်မရှိ တတ်မြောက်ကျွမ်းကျင်ရ၏။

၄။ သုဂတောဂုဏ်တော် ပွားလျှင်၊ စကားစစ်ထိုးနိုင်၏၊ အမှုအခင်းနိုင်၏၊ အရောင်းအဝယ်ကောင်း၏၊ အရေးကြီးကိစ္စပြောဆိုအောင်မြင်၏။

၅။ လောကဝိဒူဂုဏ်တော်ကို ပွားလျှင်၊ လောကရေး၊ လူမှုရေးအဖြာဖြာတို့ကို ရှင်းရှင်းလင်းလင်း ပိုင်ပိုင်နိုင်နိုင်သိ၏။

၆။ အနုတ္တရောဂုဏ်တော်ကို ပွားလျှင်၊ လူ၊ နတ်တို့၏ အလယ်တွင်ကျော်ဇော၏၊ လူတစ်ကာ ချစ်ခင်ခြင်း လေးစားခြင်းကိုခံရ၏။

၇။ သတ္တာဒေဝမနုဿနံဂုဏ်တော်ကို ပွားလျှင်၊ နှုတ်စ၊ လျှာစထက်မြက်ရ၏၊ ဆိုတိုင်းရ၏၊ ပြောတိုင်းအောင်၏၊ ကြံတိုင်းပြီးမြောက်ရ၏။ (စိတ္တဇ၊ ဝေဒနာရှင်များကို ဤဂုဏ်တော်ကိုရွှတ်ပြီး ရေမန်းထုတ်လျှင် ပျောက်ကင်းရ၏။)

၈။ ဗုဒ္ဓါဂုဏ်တော်ကို ပွားလျှင်၊ ဘေးဆိုး၊ ရန်ဆိုး၊ ကြမ္မာဆိုး၊ အမျိုးမျိုးမှလွတ်ကင်း၍၊ ချမ်းသာခြင်း အမျိုးမျိုးနှင့်ပြည့်စုံရ၏။

၉။ ဘဂဝါဂုဏ်တောကို ပွားလျှင်၊ ဘုန်းတန်ခိုးကြီး၏၊ တေဇော်အနုဘော်ကြီး၏၊ မိမိပြောသမျှ၊ ဟောသမျှ၊ အောင်မြင်ရ၏။

ဗုဒ္ဓဘုရားရှင်လက်ထက်တော်က “သုဘူတိ” အမည်ရှိသော ရဟန်းမထေရ်တစ်ပါးရှိခဲ့၏။ ထိုမထေရ် ဘဝတစ်ခုတွင် ဗုဒ္ဓ၏ဂုဏ်တော်များကို အမြဲမပြတ် ရွတ်ဖတ်ခဲ့၏။ ထိုဗုဒ္ဓါနုဿတိဘာဝနာ ကုသိုလ်ကြောင့် ကမ္ဘာပေါင်းများစွာ အပါယ်တံခါးပိတ်၍၊ နတ်သားဘဝ အကြိမ်သုံးသောင်း ဖြစ်ခဲ့ရ၏။ သိကြားမင်းဘဝ အကြိမ် (၈၀) ဖြစ်ခဲ့ရ၏။

စကြာမင်းအဖြစ် အကြိမ်တစ်ထောင် ဖြစ်ခဲ့ရ၏။ ရိုးရိုးပဒေသရာဇ်၊ ဧကရာဇ်မင်းအဖြစ်ကား မရေမတွက်နိုင်အောင် ဖြစ်ခဲ့ရ၏။ ဖြစ်လေရာဘဝတိုင်း စည်းစိမ်ဥစ္စာများ၏။ လျှော့ပါးခြင်းမရှိ။ ယခုနောက်ဆုံး ဂေါတမဗုဒ္ဓဘုရားရှင် လက်ထက်တော်တွင် ထိုမထေရ်သည် အဘိညာဉ်နှင့် စျာန်ဝင်စားသောအရာတွင် အမြတ်ဆုံး ဧတဒက်ဘွဲ့ကို ရရှိ၏။ ရဟန္တာမထေရ်မြတ်ကြီးဖြစ်ပြီး နိဗ္ဗာန်အငြိမ်းစားဓာတ်ကြီးသို့ အပြီးတိုင်စံဝင်သွားတော်မူပါတော့၏။

ဂုဏ်တော်ပွားရခြင်း အကျိုးကျေးဇူးများက များပြားလှ၏။ အကျိုး (၁၇)မျိုးကို ပွားများသူတိုင်း ရရှိပါ၏။

၁။ မိမိခန္ဓာကိုယ် အတွင်းသန္တာန်သည်၊ စေတီအိမ်နှင့် တူသည်ဖြစ်၍ သူတစ်ပါးတို့၏ ပူဇော်မှု လေးစားမှုကို ခံယူရ၏။

၂။ စိတ်ဓာတ် ရဲရင့်တည်ကြည်၏။

၃။ သေခါနီး မတွေဝေဘဲ သေရ၏။ သေပြီးနောက် ကောင်းရာသုဂတိဘုံသို့ ရောက်ရ၏။

၄။ နောင်အခါ ဘုရားနှင့်တွေ့လျှင် သစ္စာလေးပါးတရားတော်ကြီးကို သိလွယ်၏။

၅။ အမျိုး မြတ်၏။

၆။ သူတစ်ပါး အရိုအသေပြုခြင်းကို အမြဲခံရ၏။

၇။ ချီးမွှမ်းထိုက်သော ကိုယ်အင်္ဂါနှင့် ပြည့်စုံ၏။

၈။ အဆင်းလှ၏ အရွယ်နုပျိုရ၏။

၉။ ကိုယ်အနံ့ ကြိုင်သင်းရ၏။

၁၀။ ခံတွင်းရနံ့ မွေးကြိုင်ရ၏။

၁၁။ ကြီးကျယ်သော ဉာဏ်ပညာနှင့် ပြည့်စုံ၏။

၁၂။ နက်နဲသော ဉာဏ်ပညာနှင့် ပြည့်စုံ၏။

၁၃။ ထက်မြက်သော ဉာဏ်ပညာနှင့် ပြည့်စုံ၏။

၁၄။ လျင်မြန်သော ဉာဏ်ပညာနှင့် ပြည့်စုံ၏။

၁၅။ ရွှင်သော ဉာဏ်ပညာနှင့် ပြည့်စုံ၏။

၁၆။ ဆန်းကြယ်သော ဉာဏ်ပညာနှင့် ပြည့်စုံ၏။

၁၇။ စကားကောင်းကို ဆိုနိုင်၏။

ဤဂုဏ်တော်များကို ရွတ်ဖတ်ပါသဖြင့် ရရှိသော အကျိုးကျေးဇူး (၁၇)မျိုးကို ပညာရှိဆရာတော်ကြီးများက လွယ်လွယ်ကူကူမှတ်မိစေရန် ကဗျာ၊ လင်္ကာ၊ သီစပ်ထား၏။

စေတီအတူ၊ စိတ်မူတည်ကြည်၊
ရောက်မှီနတ်ရွာ၊ တွေ့ခါသိလွယ်၊
မြင့်နွယ်အမျိုး၊ ရိုးကျိုးခံရ၊
ပြည့်ဝအင်္ဂါ၊ ဆင်းလှစွာနှင့်
ကာယခံရင်း ကြိုင်သင်းမွှေးကြူ
ကြီးထူပညာ၊ နက်စွာထက်ရွှင်
လျင်မြန်ဆန်းကျယ်၊ ကောင်းကြွယ်စကား
ဆိုနိုင်ငြားသည်၊ ဘုရားဂုဏ်တော်
ပွားကျိုးတည်း။

ဤဘုရားဂုဏ်တော်ပွားရပါသဖြင့် ရရှိသော အကျိုး (၁၇)မျိုးကို ထေရီတေရာပါဠိတော်နှင့် အဌကထာတို့၌ ဖော်ပြထားပါ၏။

ယင်းကြောင့် ဗုဒ္ဓဘာသာဝင်သူတော်ကောင်းတို့သည် စား၊ ဝတ်၊ နေ၊ ရေးဆောင်ရွက်ကြရင်း ဉာဏလုပ်သားပဲဖြစ်ဖြစ်၊ ကာယလုပ်သားပဲဖြစ်ဖြစ် အလုပ်လုပ်ကြရင်း အကုသိုလ်စိတ်များ မဝင်ရပဲ၊ ကုသိုလ်စိတ်များ ဖြစ်နေစေရန် မြတ်ဗုဒ္ဓ၏ ဂုဏ်တော်တစ်ခုခုကို ပွားများနေနိုင်ကြပါစေရန် တိုက်တွန်းလိုက်ရပါ၏။

ယခုကာလများ ဘေးအန္တရာယ်တွေကလည်း များလှ၏။ ရောဂါအမျိုးမျိုးတို့ကလည်း တစ်ခုပြီးတစ်ခု ပေါ်ပေါက်လာရ၏။ ကမ္ဘာကြီးသည် လောဘ၊ ဒေါသ၊ မောဟ မီးကြီးသုံးမျိုး လောင်မြိုက်ခြင်းကို ခံနေရ၏။ လူသားတွေ၏ ပြုလုပ်မှုကြောင့် လူသားတွေပဲ ပြန်ခံရ၏။ မည်သည့်တိုင်းပြည်၊ မည်သည့်လူမျိုး၊ မည်သည့်ဘာသာဝင်တွေကပဲ လုပ်လုပ် မိမိပြည်တောင်စု နိုင်ငံတော်ကြီးတွင် ဘေးဥပါဒ်အမျိုးမျိုး၊ ရောဂါအမျိုးမျိုးမဖြစ်ပေါ်စေကြစေရန် ဤမျှ လွယ်ကူလှသော ဗုဒ္ဓ၏ဂုဏ်တော်တစ်ခုခုကို လူတိုင်း ပွားများနိုင်ကြပါစေဟု တိုက်တွန်းလိုက်ရပါတော့သတည်း။

အရှင်သုဓမ္မသာရ
(ဇမ္ဗူဒိပ်ဂျာနယ်)

တတတ.ဘတမေ၉၉.ဘူသါျစသအ.ခသာ
___________________________________________________

ဘုရား ဂုဏ်တော်(၉)ပါး ပါဠိ+မြန်မာပြန်နှင့် ဂုဏ်တော်ပွားရကျိုး
^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^ဂ^

ဣတိပိ သောဘဂဝါ
(၁)။အရဟံ
(၂)။သမ္မာသမ္ဗုဒ္ဓေါ
(၃)။ဝိဇ္ဇာစရဏသမ္ပနေ႖ာ
(၄)။သုဂတော
(၅)။လောကဝိဒူ
(၆)။အနုတ္တရော ပုရိသဒမ္မသာရထိ
(၇)။သတ္ထာ ဒေဝမနုဿာနံ
(၈)။ဗုဒ္ဓေါ
(၉)။ဘဂဝါ

(၁)။အရဟံ = ကိလေသာ အညစ်အကြေးတို့မှ ကင်းဝေးစင်ကြယ်တော်မူသော မြတ်စွာဘုရား။

(၂)။သမ္မာသမ္ဗုဒ္ဓေါ = သိစရာမှန်သမျှ တစ်စမကျန် သယမ္ဘူဉာဏ်ဖြင့် အမှန်အတိုင်း သိတော်မူသော မြတ်စွာဘုရား။

(၃)ဝိဇ္ဇာစရဏသမ္ပနေ႖ာ = အသိတရား အကျင့်တရားတို့နှင့် ပြည့်စုံတော်မူသော မြတ်စွာဘုရား။(ဝါ)ဝိဇ္ဇာသုံးပါး၊ဝိဇ္ဇာရှစ်ပါး၊စရဏတရား (၁၅)ပါးတို့နှင့်ပြည့်စုံတော်မူသော မြတ်စွာဘုရား။

ဂ ဝိဇ္ဇာသုံးပါး ဂ

(၁)။ပုဗ္ဗေနိဝါသာနုဿတိဉာဏ်=ရှေးရှေးဘဝတို့၌ ဖြစ်ပျက်ခဲ့သမျှကို ပြန်၍ သတိရနိုင်သောဉာဏ်။
(၂)။ဒိဗ္ဗစက္ခုဉာဏ် = နတ်မျက်စိကဲ့သို့ အဝေး၌ရှိသောအရာ၊သေးငယ်သော အရာတို့ကိုမြင်နိုင်သောဉာဏ်။
(၃)။အာသဝက္ခယဉာဏ်=ကိလေသာ အာသေဝေါတို့ကို ကုန်ခန်းစေသော ဉာဏ်။

ဂ ဝိဇ္ဇာရှစ်ပါး ဂ

(၁)။ပုဗ္ဗေနိဝါသာနုဿတိဉာဏ်။
(၂)။ဒိဗ္ဗစက္ခုဉာဏ်။
(၃)။အာသဝက္ခယဉာဏ်။
(၄)။ဝိပဿနာဉာဏ်=ရုပ်နာမ်တို့၏ အနိစ္စ ဒုက္ခ အနတ္တ သဘောတို့ကို သိသောဉာဏ်။
(၅)။စေတောပရိယဉာဏ်=သူတစ်ပါးစိတ်ကိုသိသောဉာဏ်။
(၆)။မနောမယိဒ္ဓိဉာဏ်=မိမိခန္ဓာကိုယ်အတွင်း၌ တစ်ခြားခန္ဓာကိုယ်တစ်ခုကို စိတ်ဖြင့်ဖန်ဆင်းနိုင်းသော ဉာဏ်။
(၇)။ဒိဗ္ဗသောတဉာဏ် =အဝေးမှ အသံ၊ သေးငယ်သော အသံတို့ကို ကြားနိုင်သောဉာဏ်။
(၈)။ဣဒ္ဓိဝိဓဉာဏ်=တန်ခိုး အမျိုးမျိုး ဖန်ဆင်းနိုင်သော ဉာဏ်။

ဂ စရဏတရားတစ်ဆယ့်ငါးပါး ဂ

(၁)။သီလ=ကိုယ် နှုတ် နှစ်ပါးကို စောင့်စည်း ထိန်းသိမ်းခြင်း ငါးပါးသီလ၊ရှစ်ပါးသီလ၊ပါတိမောက္ခသီလစသည်များ။
(၂)။ဣန္ဒြိယသံဝရ=မျက်စိ နား နှာခေါင်း လျှာ ကိုယ် စိတ် ဟူသော ဣန္ဒြေခြောက်ပါးနှင့်စပ်၍ ကိလေသာမဖြစ်ရအောင် ဖြစ်ပေါ်သမျှကို သတိဖြင့် ရှုသိနေခြင်း။
(၃)။ဘောဇနေ မတ္တညုတာ=ချင့်ချိန်၍ စားသောက်ခြင်း။
(၄)။ဇာဂရိယာနုယောဂ=နိုးနိုးကြားကြားရှိမှု၊သတိတည်းဟူသော နိုးကြားမှု အမြဲရှိနေခြင်း။
(၅)။သဒ္ဓါ =ရတနာ သုံးပါးနှင့် ကံ ကံ၏ အကျိုးကို ယုံကြည်မှု။
(၆)။သတိ=ကုသိုလ်ကောင်းမှုတို့ကို သတိရခြင်း။
(၇)။ဟိရီ=မကောင်းမှုပြုရမည်ကို ရှက်ခြင်း။
(၈)။သြတ္တပ္ပ=မကောင်းမှုပြုရမည်ကို ကြောက်လန့်ခြင်း။
(၉)။ဝီရိယ=ကုသိုလ်ရေးတို့၌ အားထုတ်ခြင်း။
(၁၀)။သုတ=အပြစ်ကင်းသော အကြားအမြင်ဗဟုသုတ။
(၁၁)။ပညာ=အသိ၊ အလိမ္မာ၊အတတ်ပညာ။
(၁၂)။ပထမစျာန်။
(၁၃)။ဒုတိယစျာန်။
(၁၄)။တတိယစျာန်။
(၁၅)။စတုတ္ထစျာန်။

(၄)။သုဂတော=ကျိုးရှိဟုတ်မှန် နှစ်တန်သော စကားကိုသာ မိန့်ကြားတော်မူတတ်သော မြတ်စွာဘုရား။(ဝါ)ကျိုးရှိဟုတ်မှန် သူခံသာသော စကားနှင့် ကျိုးရှိဟုတ်မှန် သူမခံသာသောစကား ဤနှစ်ပါးကိုသာ မိန့်ကြားတော်မူတတ်သော မြတ်စွာဘုရား။

(၅)။လောကဝိဒူ=သတ္တလောက၊သြကာသလောက၊သခါင်္ရလောက တည်းဟူသော လောကသုံးခွင်ကို အကုန်အစင်သိမြင်တော်မူသော မြတ်စွာဘုရား။

(၆)။အနုတ္တရော ပုရိသဒမ္မသာရထိ=မယဉ်ကျေးကြငြား သတ္တဝါများကို ယဉ်ပါးလေအောင် သွေးဆောင် ဆုံးမခြင်း၌ တုဘက်ကင်းတော်မူသော မြတ်စွာဘုရား။

(၇)။သတ္တာဒေဝမနုဿာနံ= လူ နတ် ဗြဟ္မာ သတ္တဝါတို့၏ ဆရာတစ်ဆူ အစစ်ဖြစ်တော်မူသော မြတ်စွာဘုရား။

(၈)။ဗုဒ္ဓေါ=သစ္စာလေးပါး အမှန်တရားကို ပိုင်းခြားထင်ထင် သိမြင်တော်မူသော မြတ်စွာဘုရား။(ဝါ)သစ္စာလေးအင်ကိုယ်တိုင်မြင်၍ တပည့်တွေကိုလဲ သိစေတော်မူသော မြတ်စွာဘုရား။

(၉)။ဘဂဝါ=ဣဿရိယ စသည် ဘုန်းခြောက်လီနှင့်စုံညီပြည့်ဝတော်မူသော မြတ်စွာဘုရား။
(က)။ကိုယ်တော်မြတ်၏ စိတ်တော်ကို စိုးပိုင် နိုင်နင်းတော်မူခြင်းတည်းဟူသော ဣဿရိယဘုန်းတော်။
(ခ)။မဂ်ဖိုလ်နိဗ္ဗာန် ကိုးတန်သော လောကုတ္တရာတရားတည်းဟူသော ဓမ္မဘုန်းတော်။
(ဂ)။ဟုတ်တိုင်းမှန်စွာ သုံးဖြာသော လောကတွင် ပျံ့နှံ့ကျော်စေရခြင်းတည်းဟူသော ယသဘုန်းတော်။
(ဃ)။အင်္ဂါကြီးငယ် တင့်တယ် ပြည့်ဖြိုး အချိုးတကျ သပ္ပာယ်တော်မူလှခြင်းတည်းဟူသော သိရီ ဘုန်းတော်။
(င)။အလိုတော်ရှိတိုင်း မဆိုင်းခဏ ပြီးစီးတော်မူရခြင်း တည်းဟူသော ကာမဘုန်းတော်။
(စ)။အရဟတ္တ မဂ်ဉာဏ်၊သဗ္ဗညုတဉာဏ်တိုင်အောင် ရစေနိုင်သည့် ကြ့ံခိုင် ကြီးမားသော ဝီရိယတော်တည်းဟူသော ပယတ္တ ဘုန်းတော်။ ဤ ဘုန်းတော်ခြောက်စုံနှင့် ကုံလုံပြည့်ဝတော်မူသော မြတ်စွာဘုရား။
ဤသို့လျှင် အရဟံစသား ဂုဏ်ကိုးပါးနှင့် ထူးခြားကုံလုံ ပြည့်စုံတော်မူသော မြတ်စွာဘုရားကို တပည့်တော်သည် ကြည်ညိုမြတ်နိုး လက်စုံမိုး၍ ရှိခိုးကန်တော့ပါ၏ မြတ်စွာဘုရား။

ဘုရားဂုဏ်တော်ပွားရခြင်းအကျိုး(လင်္ကာ)
^^^^^^^^^^^^^^^^^^^^^^^^^^^^^^^^^^^^^^^^^
စေတီပမာ ၊စိတ်မှာတည်ကြည်။
ရောက်မည်နတ်ရွာ၊တွေ့ကာသိလွယ်။
မြတ်နွယ်အမျိုး၊ရိုကျိုးခံရ။
ပြည့်ဝအင်္ဂါ၊ဆင်းလှစွာဖြင့်။
သာယာခံတွင်း၊ကြိုင်သင်းမွှေးကြူ။
ကြီးမူပညာ၊နတ်ရွာထက်ရွှင်။
လျှင်မြန်ဆန်းကြယ်၊ကောင်းကြွယ်စကား။
ဆိုနိုင်ငြားသည်၊ဘုရားဂုဏ်တော်ပွားကျိုးတည်း။

ကျမ်းကိုး။ ။ချမ်းမြေ့ဆရာတော်(လူငယ်သင် အခြေပျိုးဗုဒ္ဓဘာသာစာအုပ်