ကျေးဇူးရှင် မဟာစည်ဆရာတော်ဘုရားကြီးဟောကြားတော်မူထားတဲ့ " အရိယာဝါသ" တရားတော်ကြီး ကို ဖတ်ရှုနေရာမှ...
ဝိပဿနုာကျင့်ကြံအားထုတ်နေကြတဲ့ ဓမ္မမိတ်ဆွေ တို့ အတွက်ရော၊ ဝိပဿနာကို ခုမှ စတင်အားထုတ်ဖို့ အတွက် လေ့လာနေကြဆဲ ဖြစ်တဲ့ ဓမ္မမိတ်ဆွေ တို့ အတွက်ပါ အင်မတန်အရေးကြီးလှတဲ့ အတွက်ကြောင့် အသိပေးချင်လှတဲ့ ဓမ္မစာစုလေးကို...
" သောတာပန်လူထွက်" ဆိုတဲ့ ခေါင်းစဉ် နဲ့ ဖြန့်ဝေဒါန ပြုပါရစေ။
" ဘုန်းကြီးလူထွက်" ဆိုတဲ့ စကားကိုတော့ ကြားဖူးကြမှာဖြစ်တဲ့အတွက် ဘာကြောင့် "ဘုန်းကြီးလူထွက် " လို့ ခေါ်သလဲ ဆိုတာလည်း သိကြမှာပါ။
ရဟန်းသံဃာ တစ်ပါးဟာ သာသနာ့ဘောင်ကနေ မပျော်ပိုက်လို့ ပဲဖြစ်စေ၊ကျန်းမာရေးကြောင့်ဖြစ်စေ၊ အကြောင်းအမျိုးမျိုးကြောင့် သာသနာဘောင်ကို စွန့်ခွာပြီး လူ့ ဘောင်လောကထဲ ကို ဝင်ရောက်လာတဲ့ အခါ အဲဒီပုဂ္ဂိုလ်ကို " ဘုန်းကြီးလူထွက်" လို့ ခေါ်ကြပါတယ်။
အခုလို " သောတာပန်လူထွက်" လို့ ခေါင်းစဉ်ပေးထားတဲ့အတွက်၊ သောတာပန် အရိယာကနေပြီး သာမန်ပုထုဇဉ် ပြန်ဖြစ်တာလား ဆိုတာ ရှင်းပြဖို့ .....
" သောတာပန် "ဆိုတဲ့အဓိပ္ပါယ်ကို သိတဲ့ ဓမ္မမိတ်ဆွေ ရှိသလို၊ ခုမှ စပြီး လေ့လာဆည်းပူးနေကြတဲ့ ဓမ္မမိတ်ဆွေများထဲမှာ အဓိပ္ပါယ် နားမလည်ကြသေးတဲ့ ဓမ္မမိတ်ဆွေ တို့ ပါကောင်းပါနိုင်မှာ ဖြစ်တဲ့အတွက် သောတာပန် ရဲ့ အကြောင်း ကို အရင်ဆုံးအကြမ်းဖျင်းလောက် ရှင်းပြပါရစေ။

သောတာပန် ဖြစ်သွားတဲ့ ဒီအရိယာ ရဲ့ စိတ်နေစိတ်ထားကို ရှေးဦးစွာ ဖေါ်ပြရရင်....
သောတာပန်ဟာ...
၁။ လောဘ ဒေါသ မောဟ ပေါ်တိုင်း ပေါ်တိုင်း ချက်ချင်းသိပါတယ်။

၂။ အဲဒီလို သိတာနဲ့ တစ်ပြိုင်နက် ငြိမ်းအေးအောင်လုပ်နိုင်ပါတယ်။

၃။ ဒီမြတ်စွာဘုရား ဗုဒ္ဓသာသနာက လွဲပြီး တစ်ခြားသာသနာမှာ ထွက်ရပ်လမ်းလုံးဝမရှိဘူးဆိုတဲ့ ယုံကြည်မှုဟာလဲ သောတာပန်ရဲ့ ယုံကြည်မှုဆိုတဲ့ သဒ္ဓါဟာ ပြင်းပြပါတယ်။

၎။ အကယ်၍ သောတာပန်ဟာ သီလ ကျိူးပေါက်ပါက ကျူးလွန်ထားတဲ့အပြစ်ကို ချက်ချင်း ကုသလိုတဲ့စိတ်ပေါ်တာဟာ သောတာပန်ရဲ့ စိတ်ထားဖြစ်ပါတယ်။

၅။ ကိစ္စကြီးငယ်ရှိလို့ တရားရုံး မှာ အကူညီ သက်သေလိုက်ရပေမယ့်လည်း သီလ အပျက်မခံကြပါဘူး၊ အလွယ်ဆုံးပြောရရင် မလိမ်ဘူးပေါ့နော်။

၆။ တရားတော်တွေကို ကြားနာ ဖတ်ရှု လေ့လာတဲ့ အခါမှာလည်း အာရုံဟာ တစ်ခြား ကို စိတ်မသွားဘဲနဲ့ အနက်အဓိပ္ပါယ်ကို ခက်ခဲမှု မရှိဘဲ နဲ့ သိပြီး နာနိုင်ကြပါတယ်။

၇။ ခန္ဓာဉာဏ်ရောက်တရားတွေနာရတော့ ဝမ်းမြောက်လို့မဆုံး ကြည်ညိုလို့မဆုံး ကျေးဇူးတင်လို့ မဆုံးဖြစ်တာသည် သောတာပန် ပဲ ဖြစ်ပါတယ်။
ပုထုဇဉ် နဲ့ သောတာပန် စိတ်နေစိတ်ထား ဟာ အဲဒီ ( ၇ )ချက်မှာ ကွာခြားပါတယ်တဲ့။
ဒီတော့...
"သောတာပန်" ဖြစ်ပြီးတဲ့ ပုဂ္ဂိုလ် ဆိုတာဟာ..
နောင်သံသရာမှာ အများဆုံး ( ၇ )ဘဝသာနေရပြီးတော့၊ နောက်ဆုံးဘဝမှာ အိုနာသေ ကင်းရာဖြစ်တဲ့ နိဗ္ဗာန် ကို ရောက်မယ်။နိဗ္ဗာန်မရောက်ခင် ဖြစ်လာမဲ့ နောက်ဘဝတွေမှာလည်း " ငရဲ၊ တိရိစ္ဆာန်၊ပြိတ္တာ၊ အသုရကယ် "ဆိုတဲ့ အပါယ်လေးဘုံ မရောက်တော့တဲ့ အရိယာပုဂ္ဂိုလ် ပါပဲ။
ဒါ့ကြောင့် ဗုဒ္ဓဘာသာဝင် အများစုဟာ ခုလို တရားတွေအားထုတ်လာကြတဲ့အခါ ...
နိဗ္ဗာန် ကတော့ဝေးပါသေးတယ်၊ ရှေ့လာမဲ့ဘဝတွေ မှာ အပါယ်မကျဖို့ အရင် အရေးကြီးတယ် ဆိုပြီး ကျင့်ကြံအားထုတ်ကြတဲ့ ဓမ္မမိတ်ဆွေ တွေကသာ များကြပါတယ်။ခုလိုခေတ်ကာလမှာ...
တစ်မဂ်တစ်ဖိုလ် လောက်ရရင် သာ ပဲ၊ သံသရာမှာ အပါယ်ဆိုတဲ့ ဆင်းရဲက လုံးဝ ကင်းလွတ်ကြရမှာမို့ အားထုတ်သူ ယောဂီတို့ဟာ လောလောဆယ် မှာတော့ နိဗ္ဗာန်မျှော်မှန်းတဲ့ စိတ်ဆန္ဒရှိသူတွေ ထက်၊ သောတာပန် ဖြစ်ချင်တဲ့ စိတ်ဆန္ဒက ပိုများနေတဲ့ ယောဂီတွေ ကသာ များကြပါတယ်။
အဲဒီလို အားထုတ်ကြရင်း..
ဒီခေတ်ဒီကာလ မှာ တရားထူးရပြီး သောတပတ္တိမဂ်ဆိုက် တဲ့ ပုဂ္ဂိုလ်ထူးပုဂ္ဂိုလ်မြတ်တွေ အများအပြား ပေါ်ပေါက်လာတာနဲ့ အတူ၊ မိမိကိုယ်မိမိ သောတာပန် လို့ ခံယူထားတဲ့ ယောဂီတွေလည်း အများအပြားရှိလှပါတယ်။
ဒါကြောင့် အထက်မှာ ဖေါ်ပြခဲ့သလို၊ ကျေးဇူးရှင် မဟာစည်ဆရာတော်ဘုရားကြီးဟောကြားတော်မူထားတဲ့ " အရိယာဝါသ" တရားတော်ကြီး ကို ဖတ်ရှုပြီး ဓမ္မမိတ်ဆွေတို့ အတွက် သိစေချင်တဲ့ ဒီဓမ္မစာစုကို ..
" သောတာပန်လူထွက် "ခေါင်းစဉ်နဲ့ ဖေါ်ပြလိုက်ပါတယ်။
ဆရာတော်ကြီးက ဘယ်လို ဟောသလဲ ဆိုတော့...
" တစ်ခါက....
ဒကာတစ်ယောက်ဟာ ဘုန်းကြီးထံ လျှောက်ထားဖူးပါတယ်၊ အဲဒီ ဒကာဟာ သာမန် ဒကာတော့ မဟုတ်ပါဘူး၊ ခေတ်ပညာလည်းတတ်၊ ဗဟုသုတကလည်း အတော်အတန် ပြည့်စုံတဲ့ အထက်တန်းစား ဒကာတစ်ယောက်ပါ။
သူက.. ကမ္မဋ္ဌာန်းဆရာတစ်ပါးထံမှာ တရားအားထုတ်ပါသတဲ့၊ အားထုတ်ပြီးတဲ့အခါမှာ သူ့ ဆရာက သူ့ ကို " သောတာပန် " ဖြစ်ပြီလို့ ဆုံးဖြတ်ပေးပါသတဲ့...။
အရိယာ နဲ့ စပ်ပြီး ဒီလိုအဆုံးအဖြတ်မျိုးကို မြတ်စွာဘုရားမှတစ်ပါး၊ ဘယ်ရဟန္တာ၊ ဘယ်မထေရ် ကမှ ဆုံးဖြတ်ပေးဖူးတယ် ဆိုတာ ပိဋကတ်စာပေမှာလည်း မရှိပါဘူး၊ ဘုန်းကြီးတို့ ကတော့ ဒီလို မဆုံးဖြတ်ကောင်းဘူးလို့ လဲ အမြဲတမ်းပြောနေပါတယ်၊ ဉာဏ်စဉ်တရားကိုသာ ဟောပါတယ်၊ အဲဒီဟောလိုက်တဲ့ ဉာဏ်စဉ်တရားနဲ့ တိုက်ဆိုင်ပြီး သူ့ ဟာသူပဲ ဆုံးဖြတ်ဖို့ တာဝန်ပေးထားပါတယ်။
ခုနပြောတဲ့ ဒကာ ကတော့...
သူ့ ဆရာက " သောတာပန်" ဖြစ်ပြီလို့ ဆုံးဖြတ်လိုက်တာနဲ့ သူကလည်း " သောတာပန်" ဖြစ်ပြီလို့ ယုံကြည်ယူဆပြီးတော့၊ ( ၅ )ပါးသီလ ကိုလည်း လုံခြုံအောင် စောင့်တည်နေပါသတဲ့။
တစ်နေ့ ကျတော့..
သူကိုးကွယ်နေတဲ့ တစ်ခြားဆရာတော်ကြီး တစ်ပါးဆီကို သွားပြီးတော့...
သူတရားတွေအားထုတ်ခဲ့ပုံ၊ တွေ့ မြင်ခဲ့ပုံ နဲ့ တကွ " သောတာပန်" ဖြစ်ပြီလို့ ဆုံးဖြတ်ပေးပုံတွေကို လျှောက်ပါသတဲ့၊ အဲဒီဆရာတော်ကြီးကလည်း ဘုန်းကြီးတို့ နဲ့ တော်တော်ရင်းပါတယ်၊ ဆရာလိုပဲ ဖြစ်နေပါတယ်၊ ပိဋကတ်စာပေမှာလည်း ကောင်းကောင်းတတ်ကျွမ်းတဲ့ ဆရာတော်ကြီးပါပဲ၊ အခုထိလည်းရှိပါသေးတယ်၊ အသက်တော်က ( ၈ဝ )ကျော်၊ ( ၉ဝ ) နီးပါး ရှိနေပါပြီ၊ အဲဒီ ဒကာ လျှောက်ပုံက..
" တပည့်တော် တရားအားထုတ်ထားပါတယ်ဘုရား၊ ကိုယ်ထဲမှာ ရှုလိုက်ရင် ဓာတ်တွေ၊ သဘောတရားတွေ တရွရွ တမွမွ နဲ့ ပေါ်နေပါတယ်၊ တပည့်တော် ဆရာကလည်း " သောတာပန်" ဖြစ်ပြီလို့ ဆုံးဖြတ်ပါတယ်၊ တပည့်တော်ကလည်း " သောတာပန် " ဖြစ်ပြီလို့ ယုံကြည်နေပါတယ်..ဘုရား" လို့ သူကလျှောက်ပါသတဲ့။
အဲဒီတော့.. ဆရာတော်ကြီးက ဘယ့်နှယ်ပြောသလဲ ဆိုရင်....
" မင်းဟာ ဘာမှမဟုတ်သေးဘူး"..တဲ့၊ " မင်းဟာ တရားကို မဟုတ်သေးဘူး..မင်းဟာက သောတာပန် ဖြစ်ဖို့ ဆိုတာကတော့ အဝေကြီးပဲ၊ မင်းဥစ္စာ ဘာမှ မဟုတ်သေးဘူး" လို့ အဆုံးအဖြတ်ပေးလိုက်သတဲ့..။
ဒါနဲ့ .. အဲဒီ ဒကာဟာ သူဖြစ်ပုံကို ဆက်ပြီး ပြောပါတယ်၊
" ဒါနဲ့ ဘုရား..အဲဒီတစ်ခါတည်းက စပြီးတော့ မင်းဟာ ဘာမှမဟုတ်သေးဘူး" လို့ ဆရာတော်ကြီးက ပြောလိုက်တဲ့အတိုင်း တပည့်တော်ဟာ ဘာမှမဟုတ်သေးဘဲ ဖြစ်နေပါတယ်၊ အစတုန်းကတော့ တပည့်တော်ဟာ " သောတာပန်" ဖြစ်နေတယ် ဆိုတာနဲ့ သောတာပန်ဆိုတဲ့ အကျင့်နဲ့ ညီအောင် ( ၅ )ပါးသီလ ကို လုံလုံခြုံခြုံ နဲ့ စောင့်ထိန်းနေခဲ့ပါတယ်။ အခုတော့ ဆရာတော်ကြီးက "ဘာမှမဟုတ်သေးဘူး" ပြောတာနဲ့ တပည့်တော်ဟာ " ငါးပါးသီလတောင် မလုံတော့ပါဘူးဘုရား" လို့ အဲဒီ ဒကာ ကပြောပါတယ်။
အဲဒီတော့..
ဘုန်းကြီးက သူ့ကို အားပေးလိုက်ရသေးတယ်..
" ဟာ..ဒကာ ဒီလိုမလုပ် နဲ့ ၊ အစက ကိုယ့်ဟာကိုယ် " သောတာပန်" ဖြစ်နေမှတော့၊ ဘယ်သူက ဘာပဲပြောပြော ဖြစ်မြဲသာဖြစ်နေ၊ နောက်ပြန်မဆုတ်နဲ့ ၊ ( ၅ ) ပါးသီလ ကလည်း စောင့်မြဲစောင့်နေပေါ့ " ဘုန်းကြီး အားပေးစကားပြောလိုက်ရသေးတယ်။ အဲဒီ ဒကာ လို " သောတာပန်လူထွက်" မဖြစ်သွားဖို့ အင်မတန်မှ အရေးကြီးလှပါတယ်..တဲ့။
အဓိကပြောချင်တာက...
ဓမ္မမိတ်ဆွေတို့  သောတာပန်ဖြစ်တာ၊မဖြစ်တာထက် ၊ စရဏ လို့ ခေါ်တဲ့ အကျင့်တရားကို သာ "သီလ " လုံလုံခြုံခြုံ နဲ့  ကျင့်ကြံအားထုတ်ဖို့ လိုပါတယ်။
အကယ်၍များ စာဖတ်သူ ဓမ္မမိတ်ဆွေ တို့ အထဲမှာလည်း မိမိကိုယ်မိမိ သောတာပန်လို့ မှတ်ယူထားရင်၊ ယုံကြည်ထားရင်လည်း အဲဒီယုံကြည်ထားတဲ့အတိုင်း ဆက်လက်နေထိုင်၊ ကျင့်ကြံမြဲ ကျင့်ကြံသွားပါလို့ တိုက်တွန်းပါတယ်။
မြတ်စွာဘုရားတောင်မှ ဟောရုံသာ ဟောပေးနိုင်တာပါပဲ၊ ဒီထက်ပိုပြီး မတတ်နိုင်ပါဘူး၊ ပုဂ္ဂိုလ်တိုင်း ပုဂ္ဂိုလ်တိုင်း ကိုယ်တိုင်ကျင့်မှသာ ကိုယ်တိုင်တွေ့ ပြီး သိမှာဖြစ်ပါတယ်။
ကိုယ်တိုင်တွေ့ ပြီး အကြောင်းတရားလေးပါး နဲ့ တိုက်ဆိုင်ဖို့ သာလိုပါတယ်။
သကဒါဂါမိမဂ်ရခြင်းအကြောင်း လေးပါးလို့ မြတ်စွာဘုရား မဟောပါဘူး၊ အနာဂါမိမဂ် ရခြင်း အကြောင်း လေးပါးလို့ လည်း မြတ်စွာဘုရားမဟောပါဘူး၊ ရဟန္တာ ဖြစ်ကြောင်း လေးပါးဆိုပြီးတော့လည်း မဟောပါဘူး၊ သောတာပန် ဖြစ်မဲ့ အကြောင်း လေးပါး ပဲ ဟောပါတယ်။
၁။သူတော်ကောင်းနဲ့ ပေါင်းရမယ်။
၂။တရား နာရမယ်။
၃။နှလုံးသွင်း ကောင်းရ မယ်။
၎။အပျက် နဲ့ မဂ်နဲ့ ကိုက်ရမယ် ဆိုတဲ့ လေးပါးပါ။
အဲဒီတော့ သောတာပန် တည်တာ ကလဲ ဒိဋ္ဌိ ပြုတ်လို့ တည်တာပါပဲ။
ဒိဋ္ဌိ ပြုတ်တယ် ဆိုလို့ ရှိရင် သူ့ဟာသူ နှိုးဆော်သွားပါလိမ့်မယ်။ ရဲရင့်သွားပါလိမ့်မယ်။
ဒိဋ္ဌိ ပြုတ်ရင် "အထက်မဂ်၊အထက်ဖိုလ်"သာ သူရဖို့ ရှိတော့တယ်။ မရပါနဲ့ လို့ တောင် တားလို့ ..မရပါဘူး..တဲ့။
သကဒါဂါမ် ဖြစ်ရပါလို၏ လို့ ဆုမတောင်းနဲ့၊ အနာဂါမ် ဖြစ်ရ ပါလို၏ လို့  လည်းဆုမတောင်းပါနဲ့ ၊ ဒီမဂ်က ဆောင်သွားပါလိမ့်မယ်၊ရဟန္တာ ဖြစ်အောင်လည်း သူပဲ ဆောင်ပြီး၊ ဆက်တတ်သွားဖို့ ပဲ ရှိပါတော့တယ်။
ဒီတော့...
သောတာပန် မဖြစ်သေးဘူးဆိုပြီး စိတ်မပျက်ပါနဲ့ ..
အရေးကြီးဆုံးက...
သီလ လုံလုံခြုံခြုံ နဲ့ သာ ကျင့်ကြံအားထုတ်ကြဖို့ ထပ်မံပြီး သတိပေးရင်း..
" သောတာပန်လူထွက် " မဖြစ်အောင်၊ ဤစာစုဖြင့် ကုသိုလ်ပြုလိုက်ပါသည်။

( ခန္ဓာ-၅ပါးတစ်ဦး )