ဆရာတော်ဘုရား ဗုဒ္ဓဘာသာအရ ဘ၀ကူးဝိညာဉ် မရှိကြောင်း မှတ်ယူရပါသည်ဘုရား။
ခန္ဓာငါးပါး၌ ၀ိညာဏက္ခန္ဓာ-သိမှုဝိညာဉ်အစု-ဟု၎င်း။
နာမ်တရားကို ၀ိညာဉ်ဟု၎င်း မှတ်သိရပါသည်ဘုရား။
သို့သော်လည်း ပဋိစ္စသမုပ္ပါဒ်အရ သင်္ခါရပစ္စယာ ၀ိညာဏံ၊ ၀ိညာဏပစ္စယာ နာမရူပံ-ဟု ပါရှိပါသည်။
ပဋိစ္စသမုပ္ပါဒ်အရ ၀ိညာဉ်ကြောင့် နာမ်ရုပ်ဖြစ်ရသည်ကို မရှင်းပါသဖြင့် ဆရာတော်ဘုရားမှ ရှင်းပြပေးပါရန် ရိုသေလေးစားစွာဖြင့် လျှောက်ထားအပ်ပါသည်ဘုရား။
( မောင်အောင်မင်း-သန်လျင်မြို့ )

( ဖြေ )
ခန္ဓာငါးပါး၌ ပါရှိသော ၀ိညာဉ်မှာ သူ့ချည်းသက်သက် တည်ရှိနေသည် မဟုတ်။ ရုပ် ဝေဒနာ သညာ သင်္ခါရတို့နှင့် အတူ တည်ရှိနေသည်-ဟု ဆိုရပါမည်။

ဝိညာဉ်-ဟုခေါ်ဆိုရသော အသိစိတ်သည် ဆိုင်ရာဝတ္ထုရုပ်၌သာ တည်နေရသည်။
စက္ခုဝိညာဉ်ခေါ် မြင်သိစိတ်သည် စက္ခုဝတ္ထုခေါ် မိမိမှီရာ ၀တ္ထုရုပ်၌ မှီရပေသည်။
ထို့အတူ သောတ၀ိညာဉ်စသည် ကြားသိစိတ် စသည်တို့သည်လည်း သောတ၀တ္ထု စသည်တို့၌သာ မှီကြရကုန်မြဲတည်း။

ပဋိစ္စသမုပ္ပါဒ်အရ ၀ိညာဏပစ္စယာ နာမရူပံ-ဟူသည်မှာလည်း ၀ိညာဉ်က ဘ၀ကူးသွားပြီး နာမ်ရုပ် ဖြစ်စေသည်မဟုတ်၊ ၀ိညာဉ်ဟုဆိုရသော စိတ်တခုယုတ် ၉၀-( ၈၉) က နာမ်ရုပ်ဟုဆိုသော စေတသိက် ၅၂-ပါး၊ ရုပ် ၂၈-ပါးတို့ကို အကြောင်းအားလျော်စွာ ဖြစ်စေခြင်းကိုသာ ဆိုပါသည်။
( မီးတွင်ရှိန်ဝါ ထက်ကြပ်ပါသို့ )ဟူသော စကားအတိုင်း မီးဟုဖြစ်ပေါ်လာလျှင် ထိုမီး၏ အရှိန်အ၀ါသည်လည်း အတူတကွပါလာသည်။ အလားတူ ၀ိညာဉ် ၆-ပါး ဖြစ်ပွားလာလျှင် ထိုဝိညာဉ်တို့၏ အစွမ်းသတ္တိကြောင့် စေတသိက်ခေါ်သော နာမ်တရားများ၊ မဟာဘုတ်ကြီးလေးပါးနှင့် ဥပါဒါရုပ် ၂၄-ပါးတည်းဟူသော ရုပ်တရားများ ထင်ရှားဖြစ်ပေါ်လာမြဲပင် ဖြစ်လေသည်။