သမ္ဗုဒ္ဓေ ဘုရားရှိခိုးဂါထာကို အိမ်အတွင်း၌ နှစ်ခေါက်ထက်ပို၍ မရွတ်ဆိုရ၊ ပိုရွတ်လျှင် အိမ်စောင့်နတ် မခံနိုင်-ဟု ဆိုသည်မှာ မှန်ပါသလား၊ ဖြေရှင်းတော်မူပေးပါဘုရား။
( ခင်ချောစု-အလုံ )
( ဖြေ )
ဂုဏ်တော်ကျေးဇူးတော်နှင့်စပ်သော မည်သည့်ဘုရားရှိခိုး ဂါထာတော်၊ ပရိတ်တော်၊ တရားတော်သံကို မဆို နတ်သူတော်ကောင်း၊ နတ်ကောင်း နတ်မြတ်တို့ နှစ်သက်မြတ်နိုး ရိုကျိုးနာယူ ကြည်ဖြူ လက်ခံလေ့ရှိပါသည်။
သူတော်ကောင်းပုဂ္ဂိုလ်တို့ နေထိုင်သော အိမ်ဂေဟာတို့တွင်လည်း နတ်ကောင်း နတ်မြတ်များသာ စောင့်ရှောက် နေထိုင်လေ့ရှိတတ်ကြပါသည်၊
ဘုရားရှိခိုးခြင်း၊ ပရိတ်တော် တရားတော်များကို ရွတ်ဆိုခြင်း၊ မိမိပြုသော ဒါန သီလ ဘာဝနာတို့ကို နတ်တို့အား အမျှဝေခြင်း၊ မေတ္တာပို့ခြင်းတို့ကို အခါမလပ် ပြုလုပ်ကြခြင်းကိုသာ နတ်ကောင်းနတ်မြတ်တို့က အလိုရှိကြောင်း၊ ယင်းတရားသံ၊ အမျှဝေသံ စသည်တို့ကို နေ့ညမပြတ် ကြားလိုသိလို၊ သာဓုခေါ်လိုကြကြောင်း ဗုဒ္ဓကျမ်းစာများ၌ အဆိုရှိပါသည်။ ထို့ကြောင့် အိမ်စောင့်နတ် မခံနိုင်၍ မရွတ်ဆိုရ-ဟူသော စကား မမှန်ဟု ယုံမှတ်စေလိုပါသည်။